ASNN – “Asgjë e re nga fronti i Perëndimit.” Në fakt, titulli i librit të njohur të Erih Maria Remarkut, i përshtatur për futbollin, është ajo që i shkon më për shtat gjendjes së sportit dhe bllokimit të tij, në pamje të parë, për shkak të epidemisë së koronavirusit. Federata Shqiptare e Futbollit (FSHF) së fundmi ka bërë një kërkesë, drejtuar Ministrisë së Shëndetësisë dhe Mbrojtjes Sociale, si dhe Ministrisë së Arsimit, Sportit dhe Rinisë. Propozimi i parashtruar në shkresën që mban datën 22 prill 2020, ishte i qartë: Rinisja e stërvitjeve më 2 maj, kurse e kampionateve me 20 ose 24 maj.
Por nuk ka patur deri më tani asnjë përgjigje zyrtare, çka është pranuar edhe në institucionin e futbollit në vend. Të enjten, burime pranë organizmit që qeveris futbollin në vend kanë konfirmuar për RTSH Sport se, bazuar mbi shkresën e dërguar autoriteteve shqiptare, që mban datën 22 prill 2020, FSHF-ja ka kërkuar që skuadrat t’u kthehen stërvitjeve më 2 maj. Këto burime saktësojnë se ishte shpresuar që, në rastin më të keq, të hënën e 4 majit, skuadrat të lejohen të stërviten, natyrisht mbi bazën e një protokolli shëndetësor dhe mbrojtës nga ana e autoriteteve përkatëse.
Por gjithçka ka mbetur pezull, teksa në FSHF pohojnë se nuk kanë marrë ende përgjigje për këtë çështje. Në të njëjtën kohë, RTSH Sport ka raportuar të enjten kontaktuar edhe me Ministrinë e Shëndetsisë lidhur me shkresën mbi këtë çështje, nga e cila ka marrë një përgjigje të shkurtër, që “ende nuk ka një vendim nga autoritetet përkatëse mbi këtë çështje”. Por edhe të premten, në konferencën e Institutit të Shëndetit Publik, është prekur si temë edhe futbolli. “A do ketë një përgjigje për FSHF”, është pyetja, ndërkohë që më pas vjen përgjigjja që nuk befason më askënd.
“Patjetër, në vazhdim Ministria e Shëndetësisë dhe Mbrojtjes Sociale do t’ju informojë”. Ende asnjë datë për rifillimin e stërvitjeve të ekipeve të futbollit, edhe pse rrugët e kryeqytetit shihen plot gjatë këtyre ditëve.
