ASNN – Do të mbizotërojë frika për shëndetin, e kushtëzuar nga epidemia e koronavirusit, apo ajo e presionit të madh financar, që mund të rezultojë po aq vrastar për këtë sport që është ndër më të shtrenjtët në botë. Rreziku mbetet i madh për të dështuar, por shpresa ekziston. Formula 1 mund të fillojë në 5 korrik me Çmimin e Madh të Austrisë dhe me një kalendar të shkurtuar.
Deri tani janë anuluar 10 gara nga kalendari paraprak, duke nisur me atë të Australisë që duhej mbajtur në muajin mars, e për të përfunduar me Çmimin e Madh të Francës. Madje këto anulime anuluan më pas edhe kalendarin e rishikuar, deri në pikë kur organizmat që administrojnë Formulën 1, Federata Ndërkombëtare e Automobilizmit (FIA), dhe kompania “Liberty Media”, të heqin dorë nga përpilimi i një kalendari.
Autoritetet franceze e vlerësuan si të pamundur organizimin e garës së këtij viti, të planifikuar për t’u mbajtur më 28 qershor 2020, për shkak të epidemisë së koronavirusit, që ka mbërthyer më së shumti kontinentin e vjetër. Presidenti francez, Emanuel Makron, kishte ndaluar më parë çdo veprimtari sportive në vend, deri në mesin e muajit korrik.
Konfirmohet, ndërkaq, Çmimi i Madh i Britanisë, ndonëse ai nuk do të jetë si zakonisht. Organizatorët e garës që mbahet në pistën e Silverstounit, lajmëruan se ata po përgatiten për të zhvilluar garën, por theksuan se ajo do të jetë pa tifozë. Humbja financiare është e madhe sepse një ngjarje e tillë sportive zakonisht ndiqet nga më shumë se 100 000 spektatorë përgjatë 3 ditëve të fundjavës.
Mbretëria e Bashkuar vazhdon të jetë e goditur fort nga epidemia e koronavirusit, por autoritetet sportive besojnë se janë kushtet për të zhvilluar garat, nën masa të forta sigurie. Formula 1 parashikon të ketë gjithsej 12 gara këtë sezon dhe mund të fillojë më 5 korrik 2020, në Austri, dhe të përfundojë më 29 nëntor 2020, në kryeqytetin e Emirateve të Bashkuara Arabe, Abu Dhabi.
