ASNN – “Shqipëria ka një projekt të bukur, që përfshin rritjen dhe dërgimin e Kombëtares në nivele të larta.” Kështu ka deklaruar për mediat italiane ndihmësi i trajnerit Edi Reja te Kombëtarja shqiptare, Serxhio Porrini, i cili zbulon se projekti i ardhshëm është të krijojnë një skuadër e nivelit të lartë, duke marrë si shembull Irlandën.
Në një intervistë për faqen sportive italiane, “itasportpress.it”, bashkëpunëtori i Rejës thekson se Shqipëria po punon vazhdimisht për të zbuluar talente të reja në futboll, ndërsa si objektiv kryesor mbetet rritja e nivelit të lojtarëve në skuadrat që përfaqësojnë duke krijuar një kombëtare më konkurruese. “Pritshmëritë ndryshuan pas Euro 2016 dhe drejtuesit e futbollit kanë investuar shumë”, – ka deklaruar ai për median në fjalë.
“Ka një dëshirë të madhe për t’u rritur dhe një projekt specifik për të qëndruar lart, – ka vijuar Porrini. – Po rritemi, sidomos në aspektin mbrojtës. Kemi shumë mbrojtës interesantë si Kastriot Dermaku, Marash Kumbulla dhe Berat Gjimshiti, përveç portierëve Thomas Strakosha dhe Etrit Berisha. Është e rëndësishme që ata të dallohen në kampionate të nivelit të lartë. Kjo i ndihmon të përmirësohen.
“Duam që kualifikimi në Euro 2016 të mos mbesë një rast i izoluar, shpresojmë të formojmë një grup të aftë për të qëndruar gjatë në nivele të larta, – ka theksuar 51-vjeçari. 0- Në këtë sens, modeli jonë është Irlanda, që gjithmonë ka arritur të ndërtojë hapësirën e saj në një nivel kontinental vitet e fundit. Ka shumë entuziazëm në Shqipëri dhe po punojmë për të zbuluar talente të reja.”
Serxhio Porrini është ndihmësi i parë i Edoardo Rejës te Kombëtarja e Shqipërisë. 51-vjeçari ishte pjesë e Juventusit në 1996, vit kur bardhezinjtë fituan për herë të dytë dhe të fundit trofeun e Ligës së Kampioneve. Ish-mbrojtësi fitoi kupa edhe me Gllasgou Rejxhërs në Skoci, teksa punon te Shqipëria prej prillit të vitit të kaluar, në krah të veteranit Reja.
