ASNN – Evropiani i Moskës zhvendoset nga java e 3-të e prillit, në javën e dytë të qershorit. Peshëngritja është bërë viktima më e fundit e epidemisë së koronavirusit, teksa është njoftuar se Kampionati Evropian i shtangës për Të Rritur është shtyrë me disa muaj. I planifikuar të mbahej në javën e 3-të të prillit në kryeqytetin e Rusisë, Moskë, ky turne kontinental tanimë është zhvendosur në verë dhe do të zhvillohet në javën e dytë të qershorit.
Epidemia e koronavirusit, e cila po merr përmasa gjithnjë e më globale, po shkakton anulimin apo shtyrjen e një numri veprimtarish sportive kombëtare, rajonale, kontinentale apo botërore. Kështu edhe peshëngritja është viktima më e fundit e kësaj epidemia, teksa është njoftuar se Kampionati Evropian i shtangës për të Rritur është shtyrë me disa muaj. I planifikuar të mbahej në javën e 3-të të prillit në kryeqytetin e Rusisë, Moskë, ky turne kontinental tanimë është zhvendosur në verë dhe do të zhvillohet në javën e dytë të qershorit.
Një gjë e tillë është njoftuar si nga Federata Evropiane, ashtu edhe ajo Ndërkombëtare e Peshëngritjes, nëpërmjet një komunikate të shkurtër për shtyp. “Federata Evropiane e Peshëngritjes, me mbështetjen e plotë të Bordit të saj Ekzekutiv, ka vendosur, për shkak të përhapjes së koronavirusit në kontinentin tonë, të shtyjë Kampionatin Evropian të Peshëngritjes për të Rritur, që duhet të mbahej në Moskë, nga data 13, deri më 21 prill 2020”, – thuhej në komunikatën për shtyp.
Ajo sqaron se, bashkë me këtë veprimtari, janë shtyrë mbledhjet e Komiteteve të Federatës Evropiane, por edhe Kongresi Zgjedhor i saj dhe mbledhja e parë e Bordit të ri Ekzekutiv që do të dilte nga këto zgjedhje. Shqipëria planifikonte të merrte pjesë me një delegacion prej 6 deri në 8 sportistësh në këtë Evropian, që tanimë do të zhvillohet në fillim të verës, ndërsa midis kandidaturave për anëtar të Bordit Ekzekutiv të Federatës Evropiane të Peshëngritjes, është edhe Presidenti i Federatës Shqiptare të Peshëngritjes, Theodhor Masllavica.
