ASNN – Bardheblutë shënojnë të parët, por përmbysen në pjesën e dytë nga Korona Kielce. Pas fitores minimale të arritur pak ditë më parë përballë Mezokovezdit dhe asaj humbjeje në miqësoren e parë, 1-2, përballë vendasve të Alaniasporit, Tirana ka zhvilluar të mërkurën miqësoren e 3-të në Turqi. Bardheblutë janë mundur 1-2 përballë polakëve të Korona Kielces, në takimin e zhvilluar në Antalia. Tirana ka pësuar humbjen e dytë në këto 3 ndeshje miqësore të deritanishme, duke u mundur 1-2 përballë polakëve të Korona Kielces, në takimin e zhvilluar të mërkurën në Antalia.
Kjo humbje vjen pas fitores minimale të arritur pak ditë më parë përballë Mezokovezdit dhe asaj humbjeje në miqësoren e parë, 1-2, përballë vendasve të Alaniasporit. Trajneri Emanuel Egbo e nisi takimin me 11-shen e përbërë nga Lika në portë e më pas Doka, Vangjeli, Muca dhe Ismajlgeci në mbrojtje, Batha, Çelhaka, Kale, Torasa dhe Kobina në mesfushë dhe N’Go i vetëm si sulmues i deklaruar. Nga ana tjetër, trajneri polak, Miroslav Smila aktivizioi një 11-she të përbërë kryesisht nga lojtarë të rinj dhe nga blerjet e reja të ardhur në këtë merkato janari.
Pjesa e parë ka nisur më mirë për bardheblutë, që, pas vetëm 4 minutash lojë, gjetën rrugën e rrjetës me anë të Agustin Torrasës. Argjentinasi ktheu në rrjetë një harkim brenda zone të ganezit Uinful Kobina. Tirana vijoi ta mbizotërojë lojën në vijim dhe Elton Kale shpërdoroi një rast të mirë për shënim, ndërsa në anën tjetër, polakët rrezikuan vetëm në një rast, Gregorzh Szimusik nuk e gjeti kuadratin e Likës. Pjesa e dytë do të shohë në fushë 11-shen e parë të skuadrës polake dhe pas dy minutash lojë, Korona do të barazojë shifrat në 1-1.
Gardavski pasoi zgjuarsisht për Pacindën dhe sllovaku e përcolli topin në rrjetë. Vetëm pak minuta më pas, Pacinda pasoi për Gjuranoviçin dhe malazezi nuk gaboi pas një goditjeje me kokë, duke mposhtur gardianin e portës bardheblu. Ndonëse Majkëll N’Goja rrezikoi të barazonte shifrat për Tiranën, por u ndal nga portieri Osobiński, polakët vijuan ta shtyjnë ekipin bardheblu në gjysmëfushën e vet dhe e ruajtën deri në fund fitoren me rezultatin 2-1.
Klikoni videon e mëposhtme për kronikën e plotë:
