ASNN – Mediat turke, jehonë fjalë të trajnerit kuqezi, Reja, ekipi, vizitë të dëmtuarit Dorukhan. Ndeshja me Shqipërinë ka ndezur interesim e mediave vendase dhe natyrisht, ajo që ka tërhequr më tepër vëmendjen kanë qenë fjalët e trajnerit të Kombëtares kuqezi. Mediat turke u referohen deklaratave të italianit në konferencën për shtyp mbajtur të dielën në Tiranë, ku Reja e ka cilësuar sfidën me Turqinë si shansin e fundit për Shqipërinë.
Midis fjalëve të veteranit të stolit kuqezi, mediat vendase kanë veçuar ato ku Reja e cilësonte Turqinë si shansin e fundit për Shqipërinë, ndërsa e vlerësonte skuadrën e homologut Shenjoll Gynesh si një ekip të kalibrit evropian. Po kështu, mediat turke kanë veçuar faktin se në listën e Rejës binin në sy dy njohje të futbollit turk, si sulmuesi Sokol Cikalleshi, por edhe portieri Gentian Selmani, të cilët militojnë në nivelin e dytë të kampionatit turk të futbollit.
Ndërkaq, përfaqësuesja turke ka nisur të hënën në mbrëmje seanca stërvitore, në përgatitje për ndeshjen me Shqipërinë. Seanca e parë stërvitore, e cila ishte programuar për t’u zhvilluar pasdite, është shtyrë për në mbrëmje, ndërsa të martën, lojtarët dhe stafi teknik kanë vizituar futbollistin e përfaqësueses, Dorukhan, i cili pësoi një dëmtim në ndeshjen e javës së 7-të të Superligës turke, midis Beshiktashit dhe Alaniasporit.
Ndeshja me Shqipërinë do të luhet në Stamboll dhe përfaqësuesja turke është grumbulluar në kompleksin e saj stërvitor në Riva në kryeqytet. Seancat stërvitore do të vazhdojnë si paradite ashtu edhe pasdite, deri në ditën para ndeshjes me Shqipërinë. Turqia përballet me Shqipërinë më 11 tetor në Stamboll, për të vijuar 3 ditë më pas me ndeshjen në Francë me përfaqësuesen vendase.
