ASNN – Kombëtarja kuqezi e shtangës ka mbërritur të enjten në aeroportin “Nënë Tereza” në Rinas, pas një paraqitje pozitive në kampionatin botëror të peshëngritjes në Pataja të Tajlandës, kur fitoi një medalje të bronztë, por edhe shpreson që t’i çojë dy sportistë si të kualifikuar për në Olimpiadën e vitit të ardhshëm më Tokio.
Briken Calja, sportisti që u paraqit më mirë në këtë Kampionat Botëror, shprehet i kënaqur që puna e tij e madhe u shpërblye me një vlerësim të madh siç është medalja botërore. Pas medaljes së bronzit në stilin e shkëputjes në botëror, ai synon edhe atë olimpike.
Peshëngritësi shqiptar tha se është një objektiv i arritshëm. “Do të sjell edhe medaljen olimpike, ky është synimi”, – tha Calja. 29-vjeçari u rendit i pesti në dygarësh në peshën deri 73 kilogramë, por sipas trajnerit Sokol Bishanaku, peshëngritësi i tij kishte mundësi të arrinte një rezultat më të lartë.
“Mund të kishte marrë edhe medalje argjendi dhe tentuam edhe rekordin evropian”, – tha ai. Kryetrajneri i kombëtares së shtangës është gjithashtu i bindur se sportisti nga Shtërmeni mund ta arrijë edhe objektivin olimpik.
Ndërkohë që presidenti i Federatës Shqiptare të Peshëngritjes, Theodhor Masllavica përveçse shprehet i kënaqur për arritjet e Botërorit, rithekson edhe një herë luftën ndaj dopingut, për të qenë gjithçka e pastër në këto arritje. Për peshëngritësit e tjerë ka ende shanse që të sigurojnë pikët e nevojshme për pjesëmarrje në Tokio 2020.
“Peshëngritësit e tjerë që pretendojnë do të shkojnë në turne për të marrë pikët olimpike”, – theksoi kreu i organizmit që qeveris peshëngritjen shqiptare. Lojërat Olimpike verore do të mbahen nga 24 korriku deri 9 gusht të vitit të ardhshëm në kryeqytetin e Japonisë.
