ASNN – Pas Rosit, edhe spanjolli ankohet për mungesën e fuqisë së motorit të skuadrës japoneze. Piloti spanjoll, Maverik Vinjales, ka bërë thirrje që “Jamaha” të rrisë fuqinë e motorëve të saj, pasi, sipas tij, “Dukati” dhe “Honda” por fitojnë “falas” gati 3 të dhjetat e sekondës në vijë të drejtë në krahasim me të. “Sigurisht që duam të përmirësohemi, sepse “Honda” dhe “Dukati” janë një hap përpara”, – tha Vinjalesi.

Maverik Vinjales thotë se deficiti i “Jamaha”-s sa i përket fuqisë së motorit në krahasim me rivalët e “Dukati”-t, nënkuptonte se ai “nuk kishte asnjë shans” që të mbetej në podium në Çmimin e Madh të Spanjës të dielën në Aragon. Vinjalesi shkoi deri në vendin e dytë, para “Dukati”-t të “Pramak”-ut të Xhek Millerit në xhirot e fillimit të garës prej 23 xhiros dhe, madje të krijonte edhe një hendek midis tij dhe grupit të ndjekësve.

Por Vinjalesi nisi  të humbë ritmin e garës dhe u parakalua edhe nga “Dukati” zyrtar i Andrea Doviciozos, përpara se Milleri t’i vidhte edhe shkallën e fundit të podiumit në fillim të xhiros së fundit. Doviciozo kishte një epërsi prej thuajse 5 miljesh apo 7 km në orë përgjatë segmentit prej 900 m në vijën e drejtë, çka e ndihmoi të parakalonte Vinjalesin, dhe ky i fundit pohoi se edhe Milleri do të kishte bërë të njëjtën gjë.

“Nuk kisha asnjë shans përballë motorëve të “Dukati”-t në vijë të drejtë, – tha spanjolli i “Jamaha-s”. Edhe sikund ta mbaja prapa Xhekun, ai do të më kishte parakaluar në vijë të drejtë. Kështu që nuk kisha asnjë shans të luftoja me Xhekun apo me Dovin.” Edhe Vinjalesi, ashtu si dhe Rosi, kanë pohuar, se, përtej problemeve, skuadra japoneze është përmirësuar ndjeshëm krahasuar me një vit më parë, por kanë theksuar se duhet ende shumë punë për të qenë pretendente.

Prandaj, piloti spanjoll ka bërë thirrje që “Jamaha” të rrisë fuqinë e motorëve të saj, pasi, sipas tij, “Dukati” dhe “Honda”, po fitojnë “falas” gati 3 të dhjetat e sekondës në vijë të drejtë në krahasim me të. “Sigurisht që duam të përmirësohemi, sepse “Honda” dhe “Dukati” janë një hap përpara, – tha Vinjalesi, duke shtuar: “Kështu që ato po përfitojnë deri në 3 të dhjetat e sekondës në vijë të drejtë dhe kjo është e rëndësishme përgjatë 23 xhirove.”