ASNN – Ngjitet në podium dhe është i 5-ti në dygarësh, gara erdhi drejtpërdrejt në RTSH 2. Një medalje e bronztë, por edhe një vend i 5-të në botë dhe Briken Calja e ka ngjitur Shqipërinë në podium në Botërorin e Peshëngritjes në Tajlandë. Ai është renditur i 3-ti në stilin e shkëputjes dhe i 13-ti në atë të shtytjes, por e ka mbyllur në vendin e 5-të në dygarësh.
Gara e Caljes u soll për sportdashësit drejtpërdrejt nga Rrjeti i Radio-Televizionit Shqiptar në kanalin RTSH Sport. Briken Calja është i 5-ti në Kampionatin Botëror të peshëngritjes për të rritur, që është duke u zhvilluar në Tajlandë dhe që po vjen drejtpërsëdrejti në rrjetin e Radio Televizionit Shqiptar. Jo vetëm kaq, por është i 3-ti dhe medalist i bronztë në stilin e shkëputjes.
Ndërsa me pak më shumë fat, mund të kishte arritur dhe më lart. 151 kilogramë në provën e parë, 156 kilogramë në provën e dytë dhe në të tretën ka bërë pas duke parë që kundërshtarët më poshtë ishin djegur në tentativat e tyre. Edhe në shtytje e nis mirë, ndërsa realizon në provën e parë 181 kilogramë. Por më pas nuk arrin të ngrejë dy herë 190 kilogram dhe për rrjedhojë është i trembëdhjeti në shtytje.
Në dygarësh me 337 kilogramë ka zënë vendin e pestë, ndërsa vazhdon të mbetet elitë e peshëngritjes shqiptare në arenën ndërkombëtare. Të dielën do të jetë radha e Erkand Qerimajt dhe Daniel Godellit, të dy në kategorinë e peshës trupore deri në 81 kilogram, kurse të hënën e mbyll Botërorin e Peshëngritjes për Shqipërinë, Krenar Shoraj në peshën 89 kilogramë.
