ASNN – Kombëtarja e kësaj grupmoshe, pjesëmarrëse në Turneun Ndërkombëtar të Zagrebit në Kroaci. Kështu, nga data 8, deri më 11 gusht 2019 në kryeqytetin e Kroacisë, Zagreb, do të zhvillohet një Turne Ndërkombëtar, ku do të marrë pjesë edhe Kombëtarja e Nën-19-vjeçarëve të Shqipërisë në futboll. Për këtë turne, trajneri kuqezi, Nevil Dede, ka thirrur 19 lojtarë, të gjithë të datëlindjes 2001, ndërsa skuadra ka nisur përgatitjet në Stadiumin “Loro Boriçi” të Shkodrës.

Kombëtarja shqiptare e Nën-19-vjeçarëve, e cila drejtohet nga trajneri Nevil Dede, do të marrë pjesë në Turneun Ndërkombëtar “International Memorial Tournament”, që do të zhvillohet nga data 8, deri më 11 gusht 2019 në kryeqytetin e Kroacisë, Zagreb. Në këtë turne, kuqezinjtë e vegjël do të kenë një sfidë të vështirë, pasi shorti i ka vendosur në një grup me Realin e Madridit, Olimpijan e Ljubljanës dhe Dinamon e Zagrebit. Për këtë turne, trajneri kuqezi ka thirrur 19 lojtarë, të gjithë të datëlindjes 2001.

Ndërsa skuadra ka nisur përgatitjet në Stadiumin “Loro Boriçi” të Shkodrës. Në listën e të grumbulluarve nga trajneri Dede, bie në sy se, nga 19 futbollistët e thirrur, 11 prej tyre luajnë në kampionatin shqiptar të kësaj grupmoshe, ndërsa 8 të tjerët jashtë Shqipërisë. Dy prej tyre, Gashi dhe Rexhepi, luajnë me Shkëndijën e Tetovës, Selishta vjen nga FC Kosova, Shabani vjen nga Lejton Orienti në Angli, Karrica nga Dinamo e Zagrebit dhe 3 futbollistët e tjerë, Lucaj, Beu dhe Ibrahimi, vijnë nga kampionati italian i futbollit.

Në eliminatoret e fundit të Evropianit të kësaj grupmoshe, të zhvilluara vitin e shkuar, Shqipëria e Nën-19-vjeçarëve u mund në të 3 ndeshjet përballë Ukrainës, Norvegjisë dhe Sllovakisë, duke pësuar 5 gola dhe duke mos shënuar dot asnjë.