ASNN – Dy pilotët e rinj, me një rivalitet që daton që në fëmijëri, premtojnë rivalitet në pistë. Maks Verstapen dhe Sharl Lëklerk patën një betejë epike midis tyre fundjavën që shkoi në Austri, por kjo nuk ishte hera e parë që këta dy pilotë të rinj u ndeshën me njëri-tjetrin. Madje, për ata që nuk e dinë, kjo fitore e holandezit të “Red Bull”-it ishte në fakt një hakmarrje për një incident identik midis tyre, në të cilin i riu nga Montekarlo e nxorri jo vetëm jashtë piste, por edhe jashtë gare rivalin e tij në Botërorin e garave me makinat “KART” në vitin 2011.
Maks Verstapen dhe Sharl Lëklerku kanë patur rrugëtime të ndryshme në karrierën e tyre në motosporte. Të dy bij të ish-pilotëve, por Verstapeni e filloi me makinat “KART” që kur ishte 4 vjeç e gjysmë. Lëklerku erdhi relativisht më vonë në pistë, në moshën 8-vjeçare, por të dy ata debutuan në gartat ndërkombëtare të kësaj kategorie, në KF3 në 2010-ën. Por edhe pse Sharli është 16 ditë më i vogël në moshë sesa Maksi, tanimë Verstapeni kishte më shumë se 3 vite përvojë sesa djaloshi që do t’i bëhej më vonë rival.
Që nga ajo kohë, të dy kanë ecur krah për krah, duke kulmuar me duelin e tyre në vitin 2013, ku ndanë dy vendet e para. Por ndërkohë që Sharl Lëklerku, nën udhëheqjen e qetë të agjentit të tij, Nikolas Todt, pati një rrugëtim të shtruar drejt Formulës 1, duke kaluar nga Formula Renault në 2014-ën, Formula 3 në 2015-ën, GP3 në 2016 dhe Formula 2 në 2017-ën, duke u kurorëzuar “kampion” në këto dy të fundit, rrugëtimi i Verstapenit ka qenë më i shpejtë dhe më i vrullshëm. Ai u regjistrua si pilot i 3-të i “Toro Rosos” në 2014-ën.
Duke zgjedhur kështu “Red Bull”-in edhe pse kishte ofertë edhe nga “Mercedes”-i. Piloti holandez debutoi zyrtarisht me skuadrën austriake në mars të 2015-ës, ndërsa që nga ajo kohë, ai është shndërruar në një nga protagonistët e Formulës 1. Ndërkohë, edhe pse debutoi këtë sezon si pilot i dytë i “Ferrarit”, edhe Sharl Lëklerku nuk ka humbur kohë për të dëshmuar potencialin e tij. Me pak fjalë, me Verstapenin dhe Lëklerkun në formën që po dëshmojnë këtë sezon, e ardhmja e Formulës 1 sapo ka mbërritur në pistë.
