ASNN – Skuadra e trajneres Mirza Alibegaj mundet 36-89 përballë Holandës në ndeshjen më të dobët deri tani. Shqipëria e koshit po merr pjesë në Divizionin B të Kampionatit Evropian të Basketbollit për vajzat e grupmoshës deri në 18-vjeç, aty ku po përballet në grupin D, me Holandën, Suedinë, Luksemburgun, Ukrainën dhe Britaninë e Madhe. Ndeshjet e këtij grupi po zhvillohen në kryeqytetin e Maqedonisë Veriore, Shkup.
Dhe skuadra kuqezi, e drejtuar nga trajnerja Mirza Alibegaj dhe ndihmësja Anila Çobaj, ka pësuar të dielën humbjen e 3-të në po aq ndeshje që ka zhvilluar deri më tani në kuadër të këtij grupi. Dhe pasi janë mundur 46-100 përballë Suedisë në takimin e parë, 49-74 përballë Luksemburgut në atë të dytin, vajzat kuqezi kanë kapitulluar me shifrat 36-89 përballë Holandës në ndeshjen e 3-të, në atë që ishte padyshim paraqitja më e dobët e Shqipërisë në ndeshjet e këtij grupi.
Përveç numrit më të vogël të pikëve të shënuara, kjo ishte një ndeshje për t’u harruar për skuadrën e Alibegajt, edhe për paraqitjen që bëri në përgjithësi. 10-minutëshi i parë i këtij takimi është fituar nga holandezet me shifrat 20-13. Por ai i dyti ka qenë për t’u harruar për vajzat kuqezi, të cilat, në 10 minuta lojë, kanë arritur të shënojnë vetëm një kosh, vetëm një 3-pikësh pas një këmbënguljeje të gjatë të Klea Verrit. Për këtë arsye, Holanda e fiton këtë pjesë loje 26-3 dhe shkon në pushimin e madh midis dy gjysmave duke kryesuar bindshëm, 46-16.
Ndonëse Shqipëria është munduar të reagojë në pjesën e 3-të, janë holandezet që e fitojnë atë me shifrat 18-9 dhe vijojnë ta ruajnë zotërimin e lojës edhe në 10-minutëshin e 4-t dhe të fundit, të cilin e fitojnë me shifrat 25-11 dhe, bashkë me të, edhe gjithë ndeshjen me rezultatin e thellë 89-36. Kjo ishte fitorja e 3-të e holandezeve në po aq ndeshje dhe ato marrin përkohësisht kryesimin e grupit. Ndërsa Shqipëria do ta bëjë pushim ditën e hënë, për efekt kalendari, ndërsa do të rikthehet në parket të martën për sfidën me Britaninë e Madhe dhe për ta mbyllur të mërkurën fazën e grupit me Ukrainën.
