ASNN – “Nuk kishte asnjë prapaskenë apo synim keqdashës pas ndëshkimit që i kushtoi fitoren të dielën në Kanada pilotit të “Ferrarit”, Sebastian Fetelit”. Një garanci të tillë e ka dhënë vetë drejtori sportiv i Formulës 1, Ros Braun, i cili ka pohuar sidoqoftë se Formulës 1 mund të jetë më transparente në lidhje me vendimet e komisarëve të garës. Feteli u ndëshkua pas një gabimi në pilotim në garën e së dielës në Montreal, teksa ndodhej nën trysninë e Ljuis Hemiltonit, i cili mbërriti në finish i dyti, por u shpall fitues i garës.
Brauni e pranoi se ndëshkimi me 5 sekonda i gjermanit pas garës, kishte shkaktuar shumë debate. “Unë kam shumë respekt për punën e komisarëve të garës dhe për profesionalizmin e tyre dhe besoj se do të ishin ata të parët që do të thoshin se do të preferonin të mos shihnin rezultatin e një gare të vendosur nëpërmjet një dënimi”, – tha Brauni, duke vijuar: “Në të njëjtën kohë, e kuptoj sa e vështirë duhet të jetë për tifozët të kuptojnë se pse piloti në shkallën më të lartë të podiumit nuk është ai që ka kaluar i pari në vijën e finishit së pari.”
“Kjo është arsyeja pse transparenca është e rëndësishme kur bëhet fjalë për shpjegimin e vendimeve të komisarëve, veçanërisht në një sport të tillë kompleks si Formula 1”, – shtoi Brauni, ish-drejtori teknik i “Ferrarit” dhe ish-drejtori i ekipit të “Mercedes”-it, i cili sugjeroi se duhej punuar me Federatën Botërore të Automobilizmit (FIA), për të gjetur një mënyrë që komisarët e garës t’u shpjegonin tifozëve vendimet e tyre dhe se si këto vendimet të ishin të qarta për ta.
Ndërkohë që ngjarja e së dielës shkaktoi një protestë të gjerë të atyre që besojnë se komisarët kishin prishur një betejë emocionuese midis Fetelit dhe Hemiltonit, në anën tjetër, nuk ishin të paktë ata që mendonin se drejtuesit e garës kishin zbatuar vetëm rregulloren. Brauni tha se nuk do të komentojë mbi vendimin, duke pasur parasysh pozicionin e tij dhe synimin e deklaruar të Ferrarit për të apeluar, por tifozët mund të siguroheshin se ishte marrë në mënyrë të paanshme.
“Nuk ka asnjë prapaskenë apo synim dashakeq pas një vendimi të tillë, – ka këmbëngulur Brauni. – Mund të pajtoheni me vendimet e tyre, por asnjë nga ata që marrin rolin e komisarit të garës çdo fundjavë nuk ka një axhendë të fshehtë, dhe tifozët mund të jenë të sigurt për këtë.” Ros Brauni i cilësoi Sebastian Fetelin si “yllin e fundjavës” dhe tha se mund të kuptonte zhgënjimin dhe acarimin e 4 herë kampionit të botës.
