ASNN – Me peshëngritësin Endri Karina është mbyllur të shtunën konkurrimi i delegacionit kuqezi në Evropianin e shtangës, që u zhvillua në Batumi të Gjeorgjisë. 30-vjeçari ka garuar në peshën 102kg, ku në dygarësh është renditur në vendin e 12-të. Një rezultat që në pamje të parë mund të duket i dobët, por duhet patur parasysh se 30-vjeçari rikthehet në pedanën ndërkombëtare pas një mungese dyvjeçare për shkak të një ndërhyrjeje në gju.

Paraqitja e Karinës ka qenë përgjithësisht modeste, ndonëse, me pak fat, mund të kishte prekur edhe podiumin. Në stilin e shkëputjes, ai realizoi me sukses vetëm provën e parë, ku ngriti 160 kg. Në dy përpjekjet e tjera, ai tentoi fillimisht 167 kg dhe më pas 169 kg, me këtë të fundit duke synuar zonën e medaljeve, por pa sukses. Për pasojë, në këtë stil Karina u rendit në vendin e 11-të.

Edhe në stilin e shtytjes, Karina realizon vetëm një nga 3 provat që kishte në dispozicion. Pasi nuk ka arritur të ngrejë 190 kg në provën e parë, shtangisti kuqezi e realizon këtë peshë në përpjekjen e dytë. Në provën e 3-të, au tenton 195 kg, çka do ta ndihmonte në dyjarësh, por pa sukses. Në këtë stil, shtangisti kuqezi u rendit në vendin e 11-të.

Kësisoj, me 350kg në total, në dygarësh Endri Karina u rendit në vendin e 12-të, teksa kampion kontinentit u shpalll ukrainasi Dmitro Shumak). Ndërkohë, Shqipëria e mbylli këtë aventurë në Evropian me 5 medalje, një të artë, 2 të argjendta dhe 2 të bronzta. Briken Calja mori 3 medalje, një ari dhe dy argjendi, kurse Erkand Qerimaj dhe Krenar Shoraj fituan secili nga një të bronztë.