AlbanianSport.com 12/04/2019 17:35
ASNN – Bardheblutë triumfojnë 46-6 në Bosnjë-Hercegovinë ndaj FIS Vitezhit në Superligën Ballkanike. Pas një sezoni të parë të përqendruar më tepër tek njohja ndërkombëtare dhe përfitimi i përvojës, edhe duke qenë një sport rishtar, regbija shqiptare ka korrur ditët e fundit një sukses historik në veprimtaritë rajonale.
Ka qenë pikërisht “flamurmbajtësja” e këtij sporti në Shqipëri, Klubi i Regbisë Tirana, e cila ka shënuar fitoren e parë të një ekipi shqiptar në një veprimtari ndërkombëtare të regbi ligës, që është një version më i thjeshtuar i regbisë klasike. Bardheblutë, që po marrin pjesë për të dytin sezon radhazi në Superligën Ballkanike të Regbi Ligës, kanë fituar me rezultatin e thellë, 46-6, ndaj skuadrës boshnjake të FIS Vitezhit.
Sezonin e shkuar, në debutimin e tyre, kryeqytetasit e regbisë i patën humbur të dy përballjet me një skuadër serbe dhe një skuadër greke, por këtë sezon, teksa janë pjesë e grupit A1 të Divizionit të dytë, e kanë nisur mbarë me këtë fitore në Bosnjë-Hercegovinë ndaj skuadrës vendase. Po në kuadër të këtij grupi, skuadra bardheblu do të përballet në maj me malazezët e skuadrës së Rajonit Jugor,
dhe një fitore tjetër në këtë takim, që do të luhet në kryeqytetin shqiptar, do të nënkuptonte kalimin në fazën tjetër. Megjithatë, kjo fitore mbetet historike për regbinë shqiptare, e cila po ecën me hapa të vegjël, por të sigurt, drejt zgjerimit si sport, por edhe drejt afirmimit edhe në arenën rajonale dhe atë ndërkombëtare.