ASNN – Janë luajtur të enjten në mbrëmje ndeshjet e para të çerekfinaleve të Ligës së Evropës dhe interesant ishte fakti se në dy prej dueleve fituan ekipet vendase dhe në dy të tjerat, ato udhëtuese. Në takimin e sjellë për sportdashësit drejtpërdrejt nga Rrjeti i Radio-Televizionit Shqiptar, Arsenali mundi Napolin 2-0 në Londër. Veprimtaria e dytë e klubeve të kontinentit në futboll, Liga e Evropës, ka luajtur të enjten në mbrëmje aktin e parë të çerekfinaleve të saj dhe në takimin e sjellë për sportdashësit drejtpërdrejt nga Rrjeti i Radio-Televizionit Shqiptar, Arsenali mundi Napolin 2-0 në Londër.
Në fakt, fati i kësaj ndeshjeje është vendosur brenda 25 minutave të para, kur janë realizuar edhe dy golat e fitores së anglezëve, pasi 75 minutat e mbetura të saj nuk kanë sjellë gola të tjerë. Pas një çerekore lojë, Arsenali do të kalojë në epërsi kur Aron Ramsi do të finalizojë me qetësi një aksion të rrjedhshëm të vendasve. Skuadra italiane është goditur nga goli dhe nuk ka patur shumë kohë për të reaguar, pasi ka pësuar një tjetër gol 10 minuta më pas, kur Kalidu Kulibali do të devijojë në rrjetën e tij një goditje të londinezëve.
Edhe pse 20 minutat e mbetura të pjesës së parë dhe e gjithë pjesa e dytë kanë qenë e luftuar, ato nuk kanë sjellë gola të tjerë dhe Arsenali merr me vete një epërsi dygolëshe për ndeshjen e kthimit pas një jave në Itali. Një epërsi dygolëshe merr me vete edhe Benfika në Gjermani për ndeshjen e kthimit, pasi fitoi 4-2 në shtëpi ndaj Eintrahtit të Frankfurtit, por edhe Valencia, që fitoi 3-1 në fushën e Vijarealit në derbin spanjoll të Ligës së Evropës. Kurse Çellsi është mjaftuar me një gol të vetëm në Republikën Çeke përballë vendasve të Sllavias së Pragës.
