ASNN – Java e 18-të e Superligës në basketboll për meshkuj ishte vendimtare të shtunën për renditjen e kampionatit, e ndoshta dhe fazën e “play-off”-it, pasi konfirmoi skuadrën e Goga Basketit si ekipin më të mirë të këtij edicioni, pasi ajo mposhti në duelin derbi në Durrës, rivalen kryesore për titull, Teutën. Ishte një ndeshje e madhe ndërmjet dy pretendentëve kryesorë për trofeun dhe dhuroi jo vetëm rivalitet dhe emocione, por dhe një spektakël të garantuar si pasojë e një konkurrence mjaft të fortë.
Ndeshjen e fitoi Goga Basket me rezultatin 87-81. Skuadra private durrsake e bëri diferencën në 10-minutëshin e parë, të cilin e fitoi 29-17, falë një loje të fortë në mbrojtje dhe të saktë në sulm, duke shfrytëzuar zhdërvjelltësinë e e veprimeve në tabelë dhe saktësinë e goditjeve për 2, e sidomos për 3 pikë. Por “Djemtë e detit” do të reagonin shpejt në 10-minutëshin e dytë, duke fituar me shifrat 27-21, duke e ngushtuar diferencën në 6 pikë.
Por pa mundur ta përmbysnin epërsinë e Goga Basket të krijuar në fraksionin e parë. Sidoqoftë, duhet thënë se skuadrat punuan fort në mbulimin e kundërshtarëve dhe shpalosën cilësitë e tyre më të mira në parket. Gjysma e parë e ndeshjes mbyllet me shifrat 50-44. Kjo epërsi e vogël në dukje i shërbeu skuadrës private të Goga Basketit të menaxhojë lojën në vazhdim. Madje falë qetësisë së krijuar arrin të fitojë edhe 10-minutëshin e tretë me shifrat 18-15.
Duke mos i dhënë mundësinë Teutës të bëjë përmbysjen e madhe në fundin e ndeshjes, sepse diferenca në 3 pjesët e para kishte shkuar në 9 pikë. Lëvizjet që bëri trajneri Melzin Lazimi rezultuan vendimtare, sepse diti ta “lexojë” dhe ta diktojë lojën në favorin e skuadrës së tij, diçka që i solli suksesin ekipit privat të Goga Basketit. Basketbolli është sport i gjithanshëm, duke nisur nga përgatitja fizike, teknike, taktike por edhe psikologjike.
Të gjithë këta elementë folën në këtë ndeshje në favor të Goga Basketit dhe trajneri Lazimi e përgatiti si duhet ndeshjen dhe meriton padiskutim lëvdata. Megjithatë, Teuta u përpoq në fund të bënte përmbysjen, duke tentuar të sfidojë rivalin me të gjithë teknikën e saj. Pati përpjekje të shumta fizike e tekniko-taktika në funksion të pikëve dhe Teuta e fitoi 10-minutëshin e katërt me shifrat 22-19, por pa mundur të përmbysë ndeshjen, të cilën e fitoi Goga Basket me rezultatin 87-81.
Duke thelluar diferencën në kryesim dhe mund të thuhet se me këtë epërsi Goga Basket jo vetëm ka siguruar vendin e parë në renditje, por ndihet favorite për të fituar edhe “play-off”-in që është përcaktues për fatet e sezonit.
Kampionati Kombëtar
i Basketbollit Meshkuj
Superliga
Java e 18-të
Të premten, 29 mars 2019:
Kamza Basket – Vllaznia 108-92
(26-21, 25-25, 23-20, 34-26)
Të shtunën, 30 mars 2019:
Goga Basket – Teuta 87-81
(29-17, 21-27, 18-15, 19-22)
Tirana – Partizani 80-91
(22-21, 14-16, 21-15, 18-23, shtesë 5-16)
Renditja
Nr. Skuadra N. F. H. Psh-Pp + / – Pikë
- Goga Basket 18 16 2 1663-1393 270 34
- Teuta 18 13 5 1593-1348 245 31
- Partizani 18 10 8 1473-1358 115 28
- Tirana 18 8 10 1430-1491 -61 26
- Kamza 18 4 14 1368-1662 -300 22
- Vllaznia 18 3 15 1398-1657 -259 21
