ASNN – Autori i golit të barazimit për Partizanin, në ndeshjenpërballë Kukësit, Jasir Asani, u shpreh pas ndeshjes se të kuqtë e meritonin pikën e marrë dhe madje kishin pasur raste mjaftueshëm për ta fituar ndeshjen. Asani ka përfituar nga rasti për të sqaruar edhe pozicionin e tij në festimin e golit, një gjest që ka të bëjë me presidentin e Kukësit Safet Gjici, i cili ishte shprehur se Partizanit në këtë periudhë i bien gjunjët, ose më saktë e lënë gjunjët.
Por që në këtë ndeshje, sipas Asanit, ishte Kukësi që s’kishte gjunjë. “E kuptojnë ata që janë sipër për kë e kisha festimin, – u shpreh Asani pa e vrarë mendjen se një lloj festimi i tillë me gjeste mund të jetë edhe objekt penaliteti disiplinor nga Komisioni i Disiplinës në FSHF, – se dëgjojmë gjëra e intervista për gjunjë që lëshojnë tani a në maj. E tregoi Partizani në këto ndeshje se kujt i lëshojnë gjunjët, kishim raste të tjera, gjunjët tanë janë shumë të sigurt e shumë të forte.”
Më tej Asani foli për 11-metërshin e akorduar nga Jorgji, duke thënë se ajo ishte e padiskutueshme dhe e kishte pranuar edhe vetë Cuculi. “Duhet të pyetni Cuculin se vetë më tha se ishte 11-metërsh, shihet qartësisht se është i tillë, – tha më tej sulmuesi i të kuqve. – Në ndeshjen tjetër mund të jetë Bardhi apo kushdo tjetër, por është mirë që mora 11-metërshin. Ne kemi pasur shumë mungesa të rëndësishme, kishim Telushin, Malën, Bardhi nuk ishte 100%.”
“Por kishim titullarë të tjerë që dhanë maksimumin dhe ia dolëm – ka vijuar ai. – Isha shumë i sigurt se do të shënoja nga pika e bardhë, kisha shumë vetëbesim.” Në fund, talenti i Partizanit pranoi se kampionati ka ende shumë ndeshje deri në fund dhe nuk duhej folur për titullin që tani dhe se të gjitha ndeshjet e mbetura do të merrnin vëmendjen maksimale të “demave”. “Nuk flasim që tani për titullin që kemi edhe shumë ndeshje”, – ka thënë Asani.
“Secila ndeshje është e vështirë, Kukësi është i fortë. Por sot treguam se kush është më i fortë për kampion, nëse i marrim ndeshjet një nga një jemi në rrugën e duhur për të shkuar te titulli”, – shtoi më tej “heroi” i Partizanit të premten në Stadiumin “Loro Borici”, Jasir Asani.
