ASNN – Gjermania është shquar gjatë viteve të fundit si skuadra më produktive në sulm, një makineri e vërtetë golash sidomos në Botërorin e vitit 2014, por këtë edicion eliminator të “Euro 2020”-ës, mbetet për t’u parë. Sidoqoftë, gjermanët e fituan ndeshjen e parë në grupin e tyre, madje ndaj një kundërshtari shumë të vështirë si Holanda, me rezultatin 3-2, duke dhënë shenjat e një “ringjalljeje” të madhe.
Por, kur janë luajtur ndeshjet e para eliminatore të “Euro 2020”-ës, 3 skuadra janë evidentuar si më sulmueset dhe më efikaset në repartin sulmues në Evropë. Natyrisht, janë ende duelet e para dhe llogaritë bëhen në fund, kjo varet dhe nga kundërshtarët që kanë në grup dhe gjendjet e momentit, por vendin e parë e zë padyshim Anglia, e cila ka realizuar 10 gola në dy ndeshje.
Në fillim mundi Republikën Çeke 5-0, e më pas mundi në Podgoricë Malin e Zi me rezultatin 5-1. Pra, Anglia ka sulmin më të mirë në Evropë momentalisht. E dyta renditet Franca, e cila në dy ndeshjet e para ka shënuar 8 gola në grupin H, pra në grupin ku ndodhet edhe Shqipëria. “Gjelat” mundën fillimisht Moldavinë 4-1, ndërsa më pas shpartalluan Islandën 4-0.
Kuptohet, francezët janë kampionët e botës në fuqi dhe duke parë kundërshtarët që kanë në grup, natyrisht që janë favoritë për t’u kualifikuar e pse jo për ta fituar trofeun e Kampionatit Evropian. Ekipi i 3-të me sulmin më të mirë është Italia, e cila ka realizuar gjithashtu 8 gola, po aq sa Franca. Italianët mundën në ndeshjen e parë Finlandën me rezultatin 2-0, ndërsa më pas luajtën “tenis” me Lihtenshtejnin.
Të cilin e mundën me shifrat e thella 6-0. Ajo që e bën të veçantë skuadrën e trajnerit Roberto Mançini në këtë edicion kualifikues është niveli i lartë vetëbesimit dhe numri i madh i lojtarëve për t’u përzgjedhur, pra mundësia e madhe e seleksionimit, gjë që i japin Italisë epërsi të dukshme për t’u kthyer si “Zonjë e rëndë” në nivelin më të lartë evropian.
