ASNN – Janë luajtur sot të gjitha ndeshjet e javës së 8-të në Grupin B të Kategorisë së Parë të Kampionatit Kombëtar të Futbollit dhe Sopoti deri më sot kryesues është ndalur në Pogradec, duke u mundur 1-2 nga Lushnja, e cila ka marrë kështu edhe kreun e renditjes. Nga ky hap fals i librazhdasve nuk ka arritur të përfitojë Dinamo, e cila nuk është në gjendje të shkëputet, edhe pse luante në shtëpi ndaj Butrintit.

Blutë e trajnerit Dritan Mehmetit kanë barazuar 1-1 me sarandjotët, teksa 10 minutat e fundit të sfidës kanë qenë dramatike. Fillimisht ka shënuar Arbër Capa nga goditja e dënimit në minutën e 83-të, ndërsa ka barazuar shkodrani Rraboshta në minutën e fundit të kohës së rregullt. Ndërkaq, Sopoti kishte ndryshuar stadium, ngaqë policia nuk e mori përsipër ndeshjen në Cërrik, por nuk rezultoi fatsjellëse fusha e Korçës.

Në qytetin juglindor ka triumfuar përvoja e lushnjarëve, që bashkë me dy golat e shënuar në pjesën e parë, i ka dhënë skuadrës së drejtuar nga trajneri Artan Bano vendin e parë me 14 pikë. Ndërkaq, pas suksesit në Pogradec, Tomori ka pritur në shtëpi fqinjët kuçovarë, të cilët kanë marrë fitoren e parë të sezonit. Edhe pse e ka dominuar lojën, skuadra e Memushit është ndëshkuar në kohën shtesë nga Naftëtari, duke dalë duarbosh nga kjo ndeshje e javës së 8-të.

Luftëtari ka lënë fundin e renditjes, duke mundur në shtëpi Shkumbinin me rezultatin 2-1. Pas fitores me Dinamon të dielën, që riktheu shpresën për një ecuri të mbarë të sezoni, Bylisi u është kthyer zhgënjimeve në fushën e vet dhe, kësaj here ballshiotët janë mundur 2-0 nga Pogradeci. Lushnjarët kryesojnë me 14 pikë, të ndjekur nga Dinamo dhe Sopoti, me nga 13, Butrinti dhe Tomori, me nga 12 dhe Pogradeci dhe Bylisi, me nga 11 pikë.

Kategoria e Parë

Grupi B

LUFTËTARI – SHKUMBINI                         2-1

Shënues: L. Shehaj 18′, Mersini 46′ / Lluca 60′(11-m.)

Gjyqtarë: A. Beqiri, E. Potomi, B. Berijolli

Stadiumi “Gjirokastra”, Gjirokastër

SOPOTI – LUSHNJA                                   1-2

Shënues: Hajdari 89′ / Branica 17′, Ruco 32′

Gjyqtarë: O. Sokoli, B. Mesi, R. Shaba

Stadiumi “Skënderbeu”, Korçë

DINAMO – BUTRINTI                                   1-1

Shënues: Capa 83′ / Rraboshta 90′

Gjyqtarë: R. Sadiku, A. Mahmuti, E. Sinanaj

Stadiumi “Selman Stëmasi”, Tiranë

BYLIS – POGRADECI                                 0-2

Shënues: Topallari 4′, Pengu 54′

Gjyqtarë: S. Çekaj, S. Zeka, E. Çuni

Stadiumi “Adush Muça”, Ballsh

TOMORI – NAFTËTARI                               0-1

Shënues: Zylyftari 90’+1

Gjyqtarë: K. Cjapi, I. Llupi, E. Begaj

Stadiumi “Jani Kosta”, Berat

Renditja

Nr.       Skuadra         N.        F.         B.        H.        Gsh-Gp          Pikë

1. Lushnja 8          4          2          2          11-5                14
2. Dinamo 8          3          4          1          11-7                13
3. Sopoti 8          3          4          1          9-7                  13
4. Butrinti 8          3          3          2          9-3                  12
5. Tomori 8          3          3          2          6-7                  12
6. Pogradeci 8          3          2          3          6-6                  11
7. Bylis 8          3          2          3          8-9                  11
8. Luftëtari 8          3          1          4          6-11                10
9. Shkumbini 8          2          0          6          8-12                6
10. Naftëtari 8          1          3          4          5-12                6