ASNN – Flamurtari thyen SHBF Tiranën, por nuk e kap dot vendin e dytë për 2 pikë. Flamurtari në basketboll për femra arriti të shtunën në Vlorë një fitore të madhe ndaj Shoqatës së Basketbollit të Femrave të Tiranës (SHBF Tirana), me rezultatin 61-53, në kuadër të javës së 17-të, duke barazuar me pikë këtë të fundit e madje mund ta kishte paralajmëruar nëse shënonte një kosh më shumë, pra vetëm dy pikë larg.
Gjithsesi, ishte një fitore me vlerë për vlonjatet, të cilat jo vetëm në rezultat, por fitojnë edhe moralisht, duke qenë në rritje dhe me pikësynime të mëdha në fazën “play-off”. Ndeshja në Vlorë ishte e rivalizuar dhe me emocione. Vendimtare ishte 10-minutëshi i parë, të cilin e fituan vajzat vlonjate të skuadrës së trajnerit Viron Toska, me shifrat 16-9. Më pas ka ekuilibër në lojë dhe rezultat dhe në mjaft momente loja luhatet, por edhe rezultati gjithashtu.
10-minutëshi i dytë përfundoi me shifrat 20-19. Skuadrat shkuan në pushimin e madh të takimit me rezultatin 36-28, një diferencë të cilën Flamurtari e ruajti me fanatizëm deri në fund. Në fakt, 10-minutëshi i 3-të ishte më i mirë për vajzat kryeqytetase të trajneres Mirza Alibegaj, që fituan 15-10. Diferenca ulet në 3 pikë dhe fatet e ndeshjes, pra të fitores, vihen në diskutim.
Por në 10-minutëshin e katërt dhe të fundit Flamurtari reziston dhe di të menaxhojë mirë deri në fund, duke fituar me shifrat 15-10 dhe krejt takimin 61-53. Madje vlonjatet, nëse do të kishin shënuar dy pikë më shumë do të kishin siguruar vendin e dytë në renditje dhe do të zbrisnin në vend të tretë SHBF Tiranën e Mirza Alibegajt.
Kampionati Kombëtar
i Basketbollit – Femra
Kategoria e Parë
Të enjten, 21 mars 2019:
SHKBF Tirana – Studenti 94-52
(22-8, 22-13, 31-11, 19-20)
Të shtunën, 23 mars 2019:
Flamurtari – SHBF Tirana 61-53
(16-9, 20-19, 10-15, 15-10)
Vllaznia – Elbasani 80-63
(25-13, 25-14, 20-12, 10-24)
Renditja
Nr. Skuadra N. F. H. Pikë
- SHKBF Tirana 17 15 2 32
- SHBF Tirana 17 12 5 29
- Flamurtari 17 12 5 29
- Vllaznia 17 9 8 26
- Studenti 17 3 14 20
- Elbasani 17 0 17 17
