ASNN – Arsenal-Napoli, finalja e parakohshme e Ligës së Evropës, për Hysajn goglat të pamëshirshme. Krahas shortit në Ligën e Kampioneve, në Nion të Zvicrës u hodh sot edhe shorti për çerekfinalet e Ligës së Evropës, ku goglat u treguan të pamëshirshme për mbrojtësin e Kombëtares, Elseid Hysaj, sepse Napoli i tij do të përballet me Arsenalin. Dy skuadra pretendente që do të duelojnë me njëra-tjetrën që në këtë fazë dhe që vetëm njëra do të mund të shkojë më tej.

Për shqiptarin Hysaj ky ishte një short shumë i ashpër, por në të njëjtën kohë interesant, pasi do të ketë një duel të fortë me shqiptarët Granit Xhaka dhe Shkodran Mustafi. Një duel interesant është dhe derbi spanjoll Vijareal-Valencia, e cila do të jetë një përplasje mes skuadrash pak a shumë të një niveli dhe njëherësh skuadra që kanë ardhur deri këtu mbi kapacitetet e tyre. Sepse në këtë fazë rivalët janë shumë të vështirë dhe Arsenali e Çellsi janë kandidatura teorikisht më të forta për të arritur tek trofeu.

Një tjetër duel interesant në çerekfinale do të jetë ai mes Benfikës dhe Frankfurtit. Eliminimi që i bënë gjermanët Interit tregon se Eintrahti nuk është i lehtë dhe mund të bëjë një surprizë të madhe në këtë edicion të Ligës së Evropës. Padyshim, shorti më i mirë nga të gjithë ka qenë për Çellsin, të cilit goglat i dhuruan në short Slavian e Pragës. Kjo e fundit bëri surprizën e madhe në 16-she sepse eliminoi Seviljen pas 120 minutash lojë.

Çellsi është me fat edhe për faktin se në gjysmëfinale, gjithmonë nëse kalon Slavian e pragës, do të përballet me fituesen e çiftit Benfika-Eintraht Frankfurt, që mendohet se ëhstë një short mjaft i pranueshëm. Pra Çellsi, teorikisht, ka shanse të shkojë pa probleme në finale dhe të jetë kandidatura kryesore për të fituar trofeun e Ligës së Kampioneve. Më poshtë jepen ndeshjet çerekfinale të përcaktuara nga shorti.

Liga e Evropës

Shorti i çerekfinaleve:

Napoli – Arsenal

Vijareal – Valencia

Benfika – Eintraht Frankfurt

Sllavia Pragë – Çellsi

Gjysmëfinalet:

Benfika – Frankfurt / Sllavia Pragë – Çellsi

Napoli – Arsenal / Vijareal – Valencia