ASNN – Të gjitha sfidat drejt finales së madhe të 29 majit 2019, drejpërdrejt në RTSH. Veprimtaria e dytë e klubeve të kontinentit, Liga e Evropës, ka hedhur të premten shortin e çerekfinaleve dhe gjysmëfinaleve, duke u treguar e pamëshirshme me skuadrat favorite. Në çerekfinale spikatin duelet Napoli-Arsenal dhe Vijareal-Valencia.
Ndonëse përbërja e 8-shes së Ligës së Evropës ka qenë pak më e pasur gjeografikisht sesa Liga e Kampioneve, edhe veprimtaria e dytë e klubeve të kontinentit nuk e ka shmangur një derbi, kur ka hedhur të premten pasdreke shortin e çerekfinaleve dhe gjysmëfinaleve të saj. Janë 6 federatat evropiane që përfaqësohen në 8 skuadrat e çerekfinaleve dhe shorti shmangur një derbi anglez, por jo një derbi spanjoll.
Vijareali dhe Valencia do të përballen midis tyre në dy duelet çerekfinale, për të vendosur se cila prej tyre do ta mbajë lart flamurin spanjoll në gjysmëfinale dhe më tej. Ndërkaq, ndonëse i ka kursyer një përballje derbi me Çellsin, shorti është treguar sidoqoftë i pamëshirshëm me Arsenalin, që e ka vënë përballë Napolit.
Një përballje ku të dyja skuadrat vijnë pas një fitoreje identike, 2-0, ndaj njëra-tjetrës në fazën e grupeve të Ligës së Kampioneve në 2013-ën. Çellsi duket paksa më e favorizuar në letër përballë Sllavias së Pragës, ndonëse çekët eliminuan në turin e 16-shes specialistët e Ligës së Evropës, Seviljen.
Në duelin e fundit çerekfinale, Benfika përballet me Eintrahtin e Frankfurtit, një duel ky që është i pari midis portugezëve dhe gjermanëve. Ndërkohë, po të premten pasdreke është hedhur edhe shorti i gjysmëfinaleve, ku fituesja e çiftit Napoli-Arsenal, do të përballet me atë të çiftit Vijareal-Valencia.
Ndërsa në duelin tjetër, fituesja e çiftit Benfika-Eintraht i Frankfurtit do të përballet me atë të çiftit Sllavia e Pragës-Çellsi. Ndeshjet e çerekfinaleve do të luhen më 11 prill dhe 18 prill 2019, ndërsa ato të gjysmëfinaleve do të luhen më 2 dhe 9 maj 2019, kurse finalja e madhe më 29 maj 2019.
Liga e Evropës
Shorti i çerekfinaleve:
Napoli – Arsenal
Vijareal – Valencia
Benfika – Eintraht Frankfurt
Sllavia Pragë – Çellsi
Gjysmëfinalet:
Benfika – Frankfurt / Sllavia Pragë – Çellsi
Napoli – Arsenal / Vijareal – Valencia
