ASNN – Hidhet shorti i çerekfinaleve dhe gjysmëfinaleve, spikat Barcelona-Mançester Junajtid. Veprimtaria më prestigjioze e klubeve të kontinentit, Liga e Kampioneve, ka hedhur të premten shortin e çerekfinaleve dhe gjysmëfinaleve, duke përvijuar edhe betejat kryesore drejt finales së madhe. Në çerekfinale spikat dueli Barcelona-Mançester Junajtid, ndërsa finalja e madhe luhet më 1 qershor 2019.
Liga e Kampioneve ka hedhur të premten në mesditë shortin e dy fazave të fundit të saj, çerekfinaleve dhe gjysmëfinaleve, duke përvijuar kështu të gjitha duelet e mundshme drejt finales së madhe të 1 qershorit 2019. Janë 5 federatat evropiane që përfaqësohen në 8 skuadrat e çerekfinaleve dhe një derbi anglez ishte i pashmangshëm. Dhe ai ka ardhur në trajtën e duelit midis Totenhemit dhe Mançester Sitit.
Dy skuadra që nuk e kanë fituar asnjëherë Ligën e Kampioneve, ndërsa 3 skuadrat e tjera angleze e kanë shmangur përballjen midis tyre. Ajaksi, skuadra që eliminoi bujshëm fituesen në fuqi, Realin e Madridit, do të përballet në çerekfinale me Juventusin, një duel që është një përsëritje e finales historike së 1996-ës, ku italianët patën triumfuar nga pika e bardhë e 11-metërshve.
Finalistja e vjetshme, Liverpuli, do të përballet me Porton, në një duel që historikisht ka folur për skuadrën angleze në të gjitha veprimtaritë. Ndërkaq, në çiftin e fundit dhe atë më të spikaturin, Barcelona do të përballet me Mançester Junajtid, në një duel gjigandësh që kanë shumë histori midis tyre. Në këtë dhjetëvjeçar të fundit sidomos, aty ku katalanët i kanë mundur anglezët dy herë në finalen e 2009-ës dhe të 2011-tës dhe ku ka spikatur padyshim Lionel Mesi.
Ndërkohë, po të premten është hedhur edhe shorti i gjysmëfinaleve, ku fituesja e çiftit Totenhem-Mançester Siti, do të përballet me atë të çiftit Ajaks-Juventus, ndërsa në duelin tjetër, fituesja e çiftit Barcelona-Mançester Junajtid do të përballet me atë të çiftit Liverpul-Porto. Ndeshjet e çerekfinaleve do të luhen më 9 prill 2019 dhe 16 prill 2019, ndërsa ato të gjysmëfinaleve do të luhen më 30 prill dhe 7 maj 2019.
Liga e Kampioneve
Shorti i çerekfinaleve:
Ajaks – Juventus
Liverpul – Porto
Totenhem – Mançester Siti
Barcelona – Mançester Junajtid
Shorti i gjysmëfinaleve:
Totenhem – Mançester Siti / Ajaks – Juventus
Barcelona – Mançester Junajtid / Liverpul – Porto
