ASNN – Zhvendosen ndeshjet e Kupës së Shqipërisë, Kategoria Superiore mbaron më 29 maj 2019. Sektori i Garave në Federatën Shqiptare të Futbollit ka bërë të ditur të enjten disa modifikime të kalendarit të Kategorisë Superiore dhe Kupës së Shqipërisë, pas një jave ndërprerje të veprimtarisë futbollistike, për shkak të dhunës së pasndeshjes midis Kamzës dhe Laçit para 10 ditësh, si dhe bojkotit të gjyqtarëve.
Organizmi që qeveris futbollin në vend ka bërë të ditur se mdeshjet e kthimit të çerekfinaleve të Kupës së Shqipërisë do të zhvillohen më datë 3 prill 2019, çka përbën një shtyrje me një javë nga 26 marsi që ishin planifikuar paraprakisht. Për rrjedhojë, ndeshjet gjysmëfinale do të zhvillohen në 24 prill dhe 8 maj 2019.
Kurse finalja e madhe e Kupës së Shqipërisë për edicionin 2018-2019 do të zhvillohet ditën e diel, më datë 2 qershor 2019. Po kështu, java e 36-të e Kategorisë Superiore, e planifikuar për t’u luajtur më datë 25 maj, do të zhvendoset për datë 29 maj 2019. Ndërsa data e tjera të kalendarit të kategorive të Kampionatit Kombëtar të Futbollit mbeten të pandryshuara, por java përkatëse zhvendoset në përputhje me këto data.
