ASNN – Bajerni i Mynihut nuk ia doli të kualifikohet në çerekfinale të Ligës së Kampioneve, megjithëse luante para 70 mijë spektatorëve të tij në “Allianz Arena”. Bavarezët u mposhtën nga Liverpuli me rezultatin 3-1. Ishte një kualifikim i zgjuar i skuadrës angleze, që për ironi drejtohet nga një trajner gjerman, Jurgen Klop. “Të kuqtë” anglezë e interpretuan mirë ndeshjen dhe ky ishte sekreti i tyre i madh, duke thumbuar atëherë kur duhet.
Statistikat e ndeshjes ishin të gjitha në favor të Bajernit, me përjashtim të rezultatit, por në futbolli ka vlerë pikërisht rezultati. Ishte Sadio Mane që shënoi i pari në minutën e 26-të për anglezët, duke e vënë Bajernin në vështirësi serioze. Ai shfrytëzoi një top mjaft të gjatë nga mbrojtja në sulm e Van Dijkut, dhe pasi e kontrolloi topin si duhet, u rrotullua mjaft bukur dhe me një gjuajtje parabol tejkaloi mbrojtësit dhe portierin Nojer, duke shënuar golin e parë.
Bavarezët qarkullonin dendur topin, por nuk kishte hapësira për të depërtuar. Megjithatë, Bajerni do të futej në lojë në minutën e 37-të, ku një harkim i shpejtë në zonë nuk u largua si duhet nga Matip dhe përfundoi në rrjetë. Pra një autogol që e riktheu Bajerin në ekuilibër me rivalin dhe bëri që pjesa e parë të mbyllej 1-1. Në pjesën e dytë pritej diçka më shumë nga ekipi gjerman, por kjo nuk ndodhi, edhe pse Bajerni e kontrollonte ndeshjen në tërësi.
Van Dijk shënoi një gol tronditës në minutën e 69-të, duke ia bërë “malore” Bajernit këtë ndeshje dhe ishte pikërisht ky gol që e nxori ekipin bavarez përfundimisht nga objektivat. Hapja e skuadrës gjermane solli rrezikun e pësimit të golit si pasojë e krijimit të hapësirave në prapavijë. Dhe në një nga kundërzbritjet e Liverpulit, Sadio Mane realizon edhe golin e dytë personal dhe të 3-tin për Liverpulin, duke mundësuar një fitore të madhe 3-1 dhe kalimin në çerekfinale.
Bavarezët eliminohen dhe e mbyllin këtu Ligën e Kampioneve për këtë sezon, ndërsa Liverpuli shfaqet si një skuadër pretendente për titullin.
Ekipet çerekfinaliste të Ligës së Kampioneve
- Ajaksi
- Barcelona
- Juventusi
- Liverpuli
- Mançester Junajtid
- Mançester Siti
- Porto
- Totenhemi
