ASNN – Tirana shënoi këtë të mërkurë një hap të rëndësishëm drejt gjysmëfinaleve të Kupës së Shqipërisë, pasi mundi me rezultatin e thellë 3-0 Laçin, në një duel të dominuar dhe interpretuar mirë, megjithëse në fund të takimit trajneri Ardian Mema tha se ishte i kënaqur vetëm me rezultatin e jo me lojën. Pjesa e parë e ndeshjes përfundoi në barazim 0-0, kjo edhe për meritë të ekipit kurbinas që nuk la hapësira.
Por në pjesën e dytë do të dilte në pah fuqia e shtatlartit Majkëll Ngo, i cili realizoi 2 gola, një në minutën e 53-të dhe një tjetër në minutën e 65-të, duke e vendosur fitoren e Tiranës në “shinat” e duhura. Për të vulosur një fitore të thellë mendoi Edon Hasani, i cili realizoi golin e tretë në minutën e 73-të. Laçi u tregua mjaft i dobët në këtë ndeshje dhe nuk e rrezikoi dot Tiranën.
Një dobësi që u pranua në fund të takimit edhe nga trajneri Besnik Prenga, i cili tha se skuadra e dinte objektivin për të cilin futej në fushë, por nuk dinte çfarë bënte në lojën e saj. Ishte një disfatë e rëndë, që nuk e ndihmon aspak Laçin, teksa meritat i shkojnë Tiranës, e cila ëhstë rritur ndjeshëm si grup dhe tani ka pretendime më të mëdha dhe në kampionat.
Me këtë rezultat, Tirana është thuajse e kualifikuar për në gjysmëfinale. Duhet thënë se Kupa e Shqipërisë është një prej aktiviteteve që përmbush objektivat sezonale të Tiranës, prandaj edhe po vlerësohet maksimalisht. Fitorja e kupës jo vetëm sjell trofeun, por i jep mundësinë skuadrës fituese të marrë pjesë direkt në Ligën e Evropës. Prandaj dhe trajneri Ardian Mema i Tiranës po i kushton rëndësi maksimale.
Dhe beson se mund t’ia dalë. Ndërkohë, ndeshja tjetër e ditës së sotme, Skënderbeu-Kamza, sic dihet nuk u luajt, pasi Kamza është përjashtuar nga aktiviteti dhe korcarët kalojnë direkt në gjysmëfinale.
Kupa e Shqipërisë
Takimet e para të çerekfinaleve:
Të martën:
Partizani – Luftëtari 1-2
Teuta – Kukësi 2-2
Të mërkurën:
Tirana – Laçi 3-0
Skënderbeu (i kualifikuar)
