ASNN – Siti “tërmet 7-ballë” ndaj Shalkes, kualifikim “me dhunë” në çerekfinale të Ligës së Kampioneve. Ndërsa vëmendjen e mbrëmjes e mori Juventusi për atë përmbysje të madhe ndaj Atletikos, një tjetër rival shumë i fortë në Ligën e Kampioneve, Mançester Siti, ia doli të korrë një sukses të bujshëm dhe të kalojë pa probleme në çerekfinale, madje si një nga rivalët kryesorë për të fituar titullin e këtij sezoni.
Skuadra e trajnerit Pep Guardiola regjistroi fitoren më të thellë në këtë edicion të kualifikimeve direkte të Ligës së Kampioneve, pasi mundi skuadrën gjermane të Shalke 04 me rezultatin tenistik 7-0. Në këtë ndeshje për “qytetarët” shënuan thuajse të gjithë, por meritë ka veterani Kun Aguerro, që shënoi i pari, fillimisht me 11-metërsh në minutën e 35-të, për të vijuar me një gol të rregullt 3 minuta më pas.
Në minutën e 43-të i erdhi radha Leroi Sanes ta mbyllte pjesën e parë me shifrat 3-0. Por Siti nuk do të ndalej me kaq. Në pjesën e dytë “Qytetarët” do të shkatërronin përfundimisht Shalken, ku u shënuan katër gola. Fillimisht shënoi Rahim Stërling në minutën e 56-të, më pas i vjen radha Bernardo Silvës për rezultatin 5-0, më tej Fil Fodenit për shifrat 6-0.
Dhe në fund Gabriel Jezusit, që mbylli ndeshjen me golin e tij dhe duke fiksuar rezultatin 7-0. Natyrisht, trajneri Pep Guardiola ka arsye të gëzohet për këtë ecuri të skuadrës, por duhet pranuar nga ana tjetër se Shalke 04 nuk mat forcën e vërtetë të një ekipi, sepse edhe në kampionatin gjerman ka pasur probleme serioze në lojë dhe rezultate.
Duhet të presim shortin në raundin tjetër për të parë se çfarë fati do t’i rezvervojnë goglat Mançester Sitit, pasi në turin tjetër këto rezultate tenistike as në ëndërr nuk mund të imagjinohen. Sepse Liga e vërtetë e Kampioneve nis pikërisht në çerekfinale.
