ASNN – Volejbolli i femrave u kthye në fundjavë me ndeshjet e javës së  11-të në Grupin A1, ku spikatën fitoret e skuadrave të mëdha e pretendente, por me një ndryshim të vetëm. Dhe ndryshimi vjen nga skuadra e Vllaznisë, e cila shtangu të shtunën në kryeqytet Partizanin me rezultatin 3-2. Ishte një ndeshje e fortë dhe me rivalitet, por në fund e fituan vajzat shkodrane, që e shtangën Partizanin e trajnerit Roland Tarja.

Që kjo ndeshje do të ishte e vështirë për Partizanin u pa që në setin e parë, i cili ishte shumë i luftuar. Edhe pse Partizani kryesoi 22-18 e më pas 23-19, Vllaznia përmbysi dhe e fitoi atë me shifrat 25-23. Partizani u “kthjellua” në dy setet në vijim dhe fitoi bindshëm me shifrat 25-15 dhe 25-17. Por shkodranet do të tregonin dhe një herë tjetër në setin e 4-t se nuk ishin rastësisht fituese, duke e mposhtur në këtë set rivalen e kuqe me shifrat 25-20.

U desh të luhej seti final për të përcaktuar fituesin dhe Vllaznia mundi Partizani me shifrat 15-11 dhe fitoi krejt ndeshjen me rezultatin 3-2, duke dhuruar një prej surprizave më të bukura të kësaj faze. Kjo disfatë ka bërë që Partizani të bjerë automatikisht në vend të katërt, pasi vendin e tretë ia merr Tirana, e cila fitoi dje pa probleme në Durrës, ndaj Teutës, me rezultatin 3-0. Ishin tre sete ku Tirana as e diskutoi fitoren , duke i fituar tre setet me shifrat 25-20, 25-7 dhe 25-19.

Një fitore të thellë e pa probleme korri edhe Barleti Volej, i cili mundi në fushë të huaj Lushnjën me rezultatin 3-0. Ishte si ndeshje stërvitore për skuadrën universitare, pasi kundërshtari nuk ka potencial teknik dhe ndodhet në vend të fundit me asnjë fitore në 11 ndeshje të luajtura. Diferencën midis dy skuadrave e tregojnë dhe shifrat e seteve të fituara nga Barleti 25-18, 25-5 dhe 25-16. Padyshim, një fitore dhe për Mirditën, e cila ruan vendin e parë sepse mundi në udhëtim Skënderbeun me rezultatin 3-1.

Ishte një ndeshje e bukur, pavarësisht epërsisë së Mirditës e cila ka në përbërje vajza cilësore dhe me përvojë dhe është një nga pretendentet për të fituar titullin. Mirdita e pati të lehtë vetëm në setin e parë, duke fituar 25-11, por më pas hasi vështirësi, sepse korçaret dhuruan lojë të bukur e rivalizuese. Seti i dytë u fitua nga Skënderbeu 25-23, ndërsa akoma më rivalizues ishte seti i 3-të, që u fitua nga Mirdita 27-25. Vajzat e skuadrës nga Rrësheni fituan dhe setin e 4-t 25-22 dhe krejt ndeshjen me rezultatin 3-1, duke ruajtur kreun e renditjes, kurse Skënderbeu mbetet në vend të 6-të.

Kampionati Kombëtar

i Volejbollit – Femra

Grupi A1

Java e 11-të

Të shtunën, 9 mars 2019:

Lushnja – Barleti Volej         0-3

(18-25, 5-25, 16-25)

Teuta – Tirana                       0-3

(20-25, 7-25, 19-25)

Skënderbeu – Mirdita           1-3

(11-25, 25-23, 25-27, 22-25)

Partizani – Vllaznia              2-3

(23-25, 25-15, 25-17, 20-25, 11-15)

Renditja

Nr.       Skuadra         N.        F.         H.        Setet               Pikë

1. Mirdita            11        9            2        29-11              27
2. Barleti Volej   11        8            3        30-14              25
3. Tirana             11        8            3        27-11              24
4. Partizani        11        8            3        27-15              23
5. Vllaznia         11        4            7        16-26              11
6. Skënderbeu  11        4            7        14-26              10
7. Teuta              11        3            8        13-25              10
8. Lushnja         11        0          11          4-33                2