ASNN – Kategoria e Parë vjen me dy sfida në Rrjetin e RTSH-së. Apolonia-Tomori, të shtunën (15:00) dhe Lushnja-Bylis (15:00) të dielën, dy përballjet më të spikatura. Kategoria e Parë e Kampionatit Kombëtar të Futbollit nis në fundjavë fazën e 3-të të saj. Siç dihet, në bazë të formulës së miratuar paraprakisht, pikët e skuadrave, të grumbulluara brenda dy fazave të para, përgjysmohen dhe vetë skuadrat e dy grupeve, atij të Veriut dhe atij të Jugut, do të ndahen më tej në dy nëngrupe.
5 skuadrat e gjysmës së sipërme të renditjes vijojnë më tej përballjen me njëra-tjetrën, me sistem vajtje-ardhje, betejën për ngjitjen në Kategorinë Superiore, ndërsa 5 skuadrat e gjysmës së poshtme, vijojnë më tej përballjen me njëra-tjetrën, me sistem vajtje-ardhje, betejën për të qëndruar në Kategorinë e Parë dhe për të mos zbritur në atë të dytën. Kështu, të shtunën, në zonën e “play-out”-it të grupit A luhen takimet Burreli-Shënkolli dhe Iliria e Fushë-Krujës – Veleçiku i Koplikut.
Kurse në zonën e “play-off”-it në grupin e Veriut, të shtunën luhet takimi Korabi i Peshkopisë-Vllaznia, kurse të dielën përballja Besëlidhja Erzeni. Ndërkaq, në zonën e “play-out”-it në grupin B, apo grupin e Jugut, të shtunën luhet vetëm përballja Apolonia-Tomori, që do të vijë për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 15:00.
Takimi tjetër i “play-out”-it, Elbasani-Pogradeci, luhet të dielën, ashtu sikundër luhen të dielën edhe dy sfidat e zonës së “play-off”-it, ku Egnatia pret në Rrogozhinë Besën, ndërsa Bylisi kryesues është mysafir në Lushnjë, për t’u ndeshur me skuadrën vendase, në takimin që do të vijë për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 15:00.
Kategoria e Parë
Grupi i Veriut
“Play-off”-i:
02/03/2019
Korabi Peshkopi – Vllaznia (15:00)
03/03/2019
Besëlidhja – Erzeni Shijak (15:00)
“Play-out”-i:
02/03/2019
Burreli – Shënkolli (15:00)
Iliria Fushë-Krujë – Veleçiku Koplik (15:00)
Grupi i Jugut
“Play-off”-i:
03/03/2019
Egnatia Rrogozhinë – Besa (15:00)
Lushnja – Bylisi (15:00)
“Play-out”-i:
02/03/2019
Apolonia – Tomori (15:00)
03/03/2019
Elbasani – Pogradeci (15:00)
