ASNN – Në kuadër të javës së 14-të të grupit A të Kategorisë së Parë në basketboll për femra, të premten u përplasën në Pallatin e Sportit “Tomor Sinani” në Elbasan skuadra vendase e Elbasanit me kryesuesen e garës, Shoqatën e Klubit të Basketbollit të Femrave të Tiranës (SHKBF Tirana) e trajnerit Erdal Borova, një takim ky i fituar nga kryeqytetaset me shifrat e thella 97-78. Ishte një fitore e lehtë, pas shumë sforco dhe e kontrolluar nga kryeqytetaset.

Me dypikëshin që morën, vajzat bardheblu sot rimarrin kreun e renditjes që e kishin humbur një ditë më parë si pasojë e fitores së Tiranës tjetër (SHBF Tirana e trajneres Mirza Alibegaj) ndaj Studentit. Tirana e Borovës e nisi dhe e mbylli ndeshjen pa hasur rivalitet, megjithëse Elbasanit iu krijuan kushte të shënonte “pafund”, sepse pikët e lojtareve vendase nuk kërcënonin objektivin e skuadrës bardheblu. Më shumë sesa fitorja e Tiranës së Borovës, lajmi është se Elbasani regjistroi humbjen e 14-të në 14 ndeshje të luajtura.

Duke dëshmuar se është sa për statistikë në garë dhe krejtësisht e pafuqishme për të përballuar rivalet shumë herë më të forta. Për SHKBF Tiranën kjo ndeshje ishte një seancë stërvitore dhe rimarrja e kreut e përmbush objektivin, pasi me fitoren e sotme skuadra e Borovës shkon në 26 pikë, një më shumë se Tirana e Alibegajt që ka 25 pikë dhe 4 pikë më shumë se Flamurtari i vendit të tretë, por vlonjatet do të kenë një duel për të luajtur të shtunën.

Pikërisht më 2 mars skuadra e trajnerit Viron Toska do të jetë në Pallatin e Sportit “Qazim Dervishi” të qytetit të Shkodrës, për t’u përballur me Vllazninë, një skuadër që nuk është aspak e lehtë. Kjo ndeshje është domethënëse për të dyja skuadrat, pasi diferenca midis tyre është vetëm dy pikë dhe një fitore e vajzave shkodrane mund të komplikonte situatën për ekipin vlonjat të trajnerit Toska. Më poshtë jepen rezultatet e ndeshjeve dhe renditja e skuadrave.

Kampionati Kombëtar

i Basketbollit – Femra

Java e 14-të:

Të enjten, 28 shkurt 2019:

Studenti – SHBF Tirana      73-104

Të premten, 1 mars 2019:

Elbasani – SHKBF Tirana   78-97

Të shtunën, 2 mars 2019:

Vllaznia – Flamurtari                        (12:00)

Renditja

Nr.       Skuadra                     N.        F.         H.        Pikë

1.        SHKBF Tirana          14        12          2        26
2. SHBF Tirana             14        11          3        25
3. Flamurtari                  13          9          4        22
4. Vllaznia                     13          7          6        20
5. Studenti                     14          2        12        16
6. Elbasani                    14          0        14        14