ASNN – Me mbylljen e merkatos së dimrit dhe njëherësh nisjen e fazës së tretë të Kategorisë Superiore, skuadrat po prezantojnë kapacitetet e tyre sportive brenda objektivave që kanë, por një pjesë e kanë humbur ritmin e dy fazave të para, sikurse janë Kukësi dhe Teuta, të cilat janë shkëputur paksa nga kreu, ndërkohë që çudinë po e bëjnë dy skuadra që ishin në vendet e fundit dhe tani po kërcënojnë çdo skuadër që u del përpara dhe që janë Tirana e Kastrioti.

Ka një të dhënë interesante që lidhet me trendin e skuadrave dhe për këtë vjen në ndihmë numri i fitoreve, barazime dhe humbjeve gjatë javëve të fundit. Duke marrë për bazë 5 takimet e fundit, ku 4 janë të fazës së 3-të dhe që i përkasin vitit 2019, konstatohet se Partizani ka ecurinë më të mirë në Superiore, një prirje pozitive dhe i qëndrueshëm, i denjë për titullin. Në 5 takimet e fundit, të kuqtë kanë siguruar 4 fitore e një humbje, pra kanë grumbulluar 12 pikë.

Fill pas tyre renditet Tirana, e cila ka siguruar 3 fitore e dy barazime. Pra plot 11 pikë. Por ndryshe nga Partizani, Tirana nuk e njeh humbjen, gjë që do të thotë se e ka kaluar situatën e vështirë dhe është future në rrugën e qëndrueshmërisë së rezultateve, duke kërcënuar edhe skuadrat rivale të kreut, pasi me këtë ritëm mund të futet në garë për një vend në Ligën e Evropës. Duket e habitshme por pas dy skuadrave të kryeqytetit, ekipi me ecurinë më të mirë të javëve të fundit është Kastrioti.

Ka grumbulluar 10 pikë në 5 ndeshjet e fundit, me një mesatare 2 pikësh për ndeshje. Tre fitore, një humbje e një barazim janë dëshmi se Kastrioti nuk është rastësi. Ka lënë vendin e fundit dhe është në të parafundit, pra është në rrugën e duhur në garën për mbijetesë. Çuditërisht, një ecuri të mirë ka pasur edhe Luftëtari i Julian Ahmatajt, që ka siguruar 8 pikë në 4 ndeshjet e fundit. Padyshim, dy skuadrat me ecurinë më të dobët janë Skënderbeu me një fitore e 4 humbje në 5 ndeshjet e fundit, si dhe Kamza.

Në 5 takimet e fundit, Kamza ka vetëm një barazim, pra vetëm një pikë dhe dëshmohet si një prej skuadrave që rrezikon rënien e pashmangshme nga Superiorja.

Ecuria e skuadrave të Superiores në 5 ndeshjet e fundit:

Nr.       Skuadra         F.         B.        H.        Pikë

1. Partizani        4          0          1          12
2. Tirana             3          2          0          11
3. Kastrioti          3          1          1          10
4. Luftëtari         2          2          1            8
5. Kukësi            2          1          2            7
6. Teuta              1          3          1            6
7. Laçi                 1          2          2            5
8. Flamurtari      1          2          2            5
9. Skënderbeu  1          0          4            3
10. Kamza 0          1          0            1