ASNN – Atletika ka një të ri që po spikat dhe ai është Franko Burraj, atleti i garës së 400 metrave. Sportisti bëri një paraqitje të shkëlqyer në Kampionatin Ballkanik të Sallave të Mbyllura (Indoor) që u zhvillua në Stamboll të Turqisë. Atleti shkodran ishte në një ditë të përsosur për të shënuar rezultatin perfekt. Rivaliteti në garën e 400 metrave ishte shumë i fortë dhe pavarësisht se Burraj kishte konkurrencë, ia doli të ngjitet në podium, pasi fitoi medaljen e bronztë si vend i 3-të në këtë garë.
Ai regjistroi kohën 47 sekonda e 76 të qindtat, duke regjistruar kështu një rekord të ri kombëtar. 21-vjeçari e uli kohën e tij në këtë garë me afro gjysmë sekonde, pasi rekordi i mëparshëm i regjistruar prej tij pak javë më parë ishte 48 sekonda e 22 të qindtat. Ky rezultat shënon një pikë kthese të fortë për atletin shkodran, pasi përmirësimi i rekordit kombëtar me gjysmë sekonde në një harku të shkurtër kohor, është një arritje fenomenale dhe tregon se sportisti mund të bëjë “mrekulli” në muajt në vijim.
Tashmë Franko Burraj mund të llogaritet si një prej atletëve fenomenalë të Shqipërisë, me shanse të mëdha për të qenë kampion Ballkani dhe Evrope, sepse është në rrugën e duhur të rezultateve. “E prisja këtë rezultat pasi jam stërvitur mirë dhe ndihem në formë të mirë, – tha ai pas garës. – Tani ambicia ime është të thyej rekordin në 200 metra. Më presin objektiva të rëndësishëm, ku i radhës është kampionati Evropian i Nën-23-vjeçarëve.”
“Po ashtu, dëshiroj të kap normën që të jem pjesëmarrës në Kampionatin Botëror të Dohas”, – përfundoi kampioni shkodran dhe rekordmeni kombëtar i 400 metrave, Franko Burraj.
