ASNN – Partizani nuk e shfrytëzoi rastin për të bërë kapërcimin e madh në renditje që do ta afronte me trofeun e kampionatit. Të kuqtë nuk e shfrytëzuan si duhet disfatën e Kukësit të premten kundër Teutës, duke mos ia dalë të merrnin pikë përballë Laçit. Ndeshja ishte me probleme, pasi gjyqtarët akorduan një 11-metërsh në favor të kurbinasve, por ishte një vendim që u kontestua gjatë nga të kuqtë kryeqytetas. Ishte minuta e 13-të e ndeshjes e cila rezultoi vendimtare për rezultatin dhe fatin e këtij takimi.

Ishte një vendim i dyshimtë i gjyqtarisë, që buroi nga një ndërhyrje e gjyqtarit anësor Avdo, ndërsa ai kryesor, Klajdi Kola, edhe pse në dilemë, vendosi të akordojë 11-metërsh,  pikërisht nga ndërhyrja e anësorit, megjithëse më parë kishte sinjalizuar për një ndërhyrje të parregullt. Si përfundim, 11-metërshit, dhe nga pika e bardhë Shtubina gjuan saktë tokazi dhe në këndin e poshtëm të krahut të majtë të portës së mbrojtur nga Alban Hoxha, duke shënuar për Laçin golin e parë e të vetëm të këtij takimi. Të dyja skuadrat në vijim patën rastet e tyre, e dëshiruan fort fitoren,

Sidomos Partizani që bëri volum të madh loje por nuk ia doli ta përmbysë rezultatin, e për pasojë e humbi këtë takim, i cili rezultoi me pikë të plota për kurbinasit. Këta të fundit treguan dhe një herë se janë kockë e fortë në garë, sidomos kur luajnë në fushën e tyre. Laçi me këtë trepikësh ngjitet sërish në vendin e 4-t, me 34 pikë, duke lënë pas Skënderbeun dhe Flamurtarin, që kanë nga 30 pikë. Sa i takon Partizanit, skuadra e Skënder Gegës pëson humbjen e parë pas tri fitoresh radhazi të këtij viti, duke mbetur në kuotën e 46 pikëve.

Plot 7 pikë më shumë se Teuta e vendit të dytë dhe 8 pikë më shumë se Kukësi i vendit të 3-të. Edhe pse kishte një mundës ta çonte në 10 pikë diferencën dhe ta vriste kampionatin, duket se humbja e sotme në Laç nuk e cënon rivalitetin dhe gara mbetet e hapur deri në fund. Në një kampionat ku ka shumë duele direkte dhe ku rivalët për titull kanë nga dy përplasje me njëri-tjetrin, atëherë me plot gojën mund të thuhet se gara për titullin është e hapur më shumë se kurrë.

Kategoria Superiore

Java e 22-të

Të premten, 15 shkurt 2019:

Teuta – Kukësi                      2-1

Të dielën, 17 shkurt 2019:

Kamza – Kastrioti                  0-1

Flamurtari – Skënderbeu    2-0

Tirana – Luftëtari                   1-1

Laçi – Partizani                     1-0

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        22        14        4            4        23-10              46
2. Teuta              22        10        9            3        28-16              39
3. Kukësi            22        11        5            6        21-13              38
4. Laçi                 22          9        7            6        18-17              34
5. Skënderbeu  22        10        3            9        23-19              33
6. Flamurtari      22          9        6            7        19-15              33
7. Tirana             22          6        7            9        26-24              25
8. Luftëtari         22          6        4          12        19-27              22
9. Kastrioti          22          6        1          15        19-39              19
10. Kamza 22          4        4          14        10-26              16