ASNN – Basketbolli i meshkujve vijon të dhurojë surpriza dhe emocione javë pas jave. Të shtunën ishte radha e skuadrave të Durrësit të tregojnë vlerat e tyre në parket dhe në të njëjtën kohë duke diktuar të gjithë ritmin dhe klasifikimin në Superligë, dëshmuar me fitoret e Teutës dhe të Goga Basket ndaj rivalëve të tyre në kuadër të javës së 12-të të kampionatit. Kështu, Teuta mundi bindshëm Vllazninë me rezultatin 99-77, duke ruajtur ritmin me skuadrën e Goga Basketit, e cila fitoi duelin e saj me Tiranën me rezultatin 84-71.
Sa i takon Goga Basketit, ekipi privat i Durrësit korri fitore bindëse me Tiranën, megjithëse bardheblutë janë “kockë e fortë” në kampionatin e meshkujve. Fitoi skuadra e trajnerit të ri, Melzin Lazimi, me rezultatin 84-71, në një ndeshje që shfaqi cilësi, rivalitet dhe bukuri. 10-minutëshi i parë përfundoi me shifrat 24-13, në favor të skuadrës durrsake, ndërsa në 10-minutëshin e dytë ishte Tirana që regjistroi një fitore të thellë me shifrat 27-15. Pra në përfundimin e dy pjesëve të para Tirana udhëhiqte 40-39, duke e bërë enigmatike vazhdimësinë e kësaj ndeshje sa i takon rezultatit.
Sidoqoftë, në 10-minutëshin e tretë fitoi Goga Basket 23-16, duke e përmbysur rezultatin dhe do t’iu vinte kapak fitores në 10-minutëshin e katërt dhe të fundit duke fituar me shifrat 22-15 dhe duke merituar fitoren. Sa i takon Teutës, skuadra e “Djemve të detit” as e vuri në diskutim fitoren, duke e nisur bindshëm dhe duke thelluar rezultatin minutë pas minute. Në të vërtetë, fitorja nuk ishte aq e lehtë, pasi shkodranët rezistuan dhe tentuan të surprizonin në mjaft raste, por përballë një skuadra si Teuta e këtij sezoni, çdo gjë dukej e pamundur.
10-minutëshi i parë përfundoi me shifrat 23-20 në favor të Teutës, kurse 10-minutëshi i dytë u fitua nga shkodranët 23-22. Ishin dy pjesë loje që shfaqën ekuilibër të plotë në lojë dhe në rezultat, pasi në pushimin e madh të ndeshjes Teuta udhëhiqte me vetëm dy pikë, konkretisht me rezultatin 45-43. Në 10-minutëshin e tretë Teuta bëri diferencën në parket falë lojës së saj ofensive dhe saktësisë në goditje, duke fituar me shifrat 30-21. Edhe 10-minutëshi i 4-t dhe i fundit ishte në krahun e Teutës, që e fitoi atë me shifrat 24-13, duke bërë kështu diferencën e duhur për ta fituar duelin.
Dhe “Djemtë e detit” fitojnë me rezultatin 99-77, me 22 pikë diferencë, duke e merituar fitoren dhe falë dypikëshit të marrë shkon në 21 pikë, vetëm një pikë më pak se Goga Basket që mban vendin e parë. Java e 12-të e Superligës së Meshkujve në basketboll nisi të premten me ndeshjen Kamza Basket-Partizani, e cila përfundoi me fitoren e thellë të të kuqve 94-46. Pra një fitore me dyfishin e pikëve, e cila nuk pati kurrfarë historie sepse kamzalinjtë ishin të dobët dhe të pamundur për të rivalizuar me ekipin e konsoliduar e pretendent të trajnerit Arben Fagu.
10-minutëshi i parë përfundoi me shifrat 15-24, ndërsa i dyti ishte mjaft i rëndë për Kamza Basket, sepse humbi me shifrat 2-15. Në 10-minutëshin e tretë Partizani vijoi të dominojë lojën dhe rezultatin, duke thelluar edhe më tej shifrat, pasi e fitoi këtë pjesë me shifrat 13-27. 10-minutëshi i katërt dhe i fundit përfundoi me shifrat 16-28, po në favor të të kuqve, të cilët e fitojnë krejt ndeshjen 94-46. Falë suksesit të djeshëm, Goga Basket mban kreun e renditjes me 22 pikë, duke lënë pas Teutën dhe Partizanin që kanë përkatësisht 21 dhe 20 pikë.
Kuptohet, Tiranën nuk e ndihmon kjo humbje, por ruan vendin e 4-t me 17 pikë. Por tani Tirana kërcënohet nga Kamza që ka 15 pikë. Më poshtë jepen rezultatet e javës së 12-të të Superligës së meshkujve dhe renditja e skuadrave.
Kampionati Kombëtar
i Basketbollit – Meshkuj
Superliga
Java e 12-të:
Të premten, 15 shkurt 2019:
Kamza Basket – Partizani 46-94
(15-24, 2-15, 13-27, 16-28)
Të shtunën, 16 shkurt 2019:
Goga Basket – Tirana 84-71
(24-13, 15-27, 23-16, 22-15)
Teuta – Vllaznia 99-77
(23-20, 22-23, 30-21, 24-13)
Renditja
Nr. Skuadra N. F. H. Pikë
- Goga Basket 12 10 2 22
- Teuta 12 9 3 19
- Partizani 12 8 4 20
- Tirana 12 5 7 17
- Kamza Basket 12 3 9 15
- Vllaznia 12 1 11 13
