ASNN – Luhen 8 takimet e para të javës së 17-të të Kategorisë së Parë, të dielën Lushnja-Besa, në RTSH (14:00). Kategoria e Parë ka luajtur të shtunën 8 nga ndeshjet e javës së saj të 17-të dhe Rrjeti i Radio-Televizionit Shqiptar ka sjellë për sportdashësit drejtpërdrejt takimin midis Vorës dhe Vllaznisë.
Kjo ndeshje u fitua nga shkodranët me rezultatin 6-1, që përfitojnë më së miri nga humbja minimale e Erzenit në fushën e Shënkollit, duke u shkëputur në plot 10 pikë krye të renditjes së Grupit A të Kategorisë së Parë. Në takimet e tjerë të këtij grupi u arritën rezultatet Burreli-Veleçiku i Koplikut 5-2, Korabi-Dinamo 1-0 dhe Iliria e Fushë-Krujës – Besëlidhja 0-0.
Ndërkaq, në grupin B, 3 ndeshjet e luajtura në shtunën dhanë rezultatet Apolonia-Oriku 0-1, Elbasani-Pogradeci 1-1 dhe Turbina e Cërrikut-Egnatia e Rrogozhinës 1-2. Dy takimet e fundit të këtij grupi luhen të dielën dhe Bylis pret në Ballsh Tomorin, kurse Besa është mysafire në Lushnjë për t’u përballur me skuadrën vendase, në takimin që do të sillet për sportdashësit drejtpërdrejt nga Rrjeti i Radio-Televizionit Shqiptar.
