ASNN – Me francezin e njohur, Abramoviçi kërkon të bindë Hazardin të rinovojë me skuadrën londineze. Është Zinedin Zidan objektivi kryesor i drejtuesve të Çellsit për zëvendësimin e Mauricio Sarrit. Londinezët janë gati të bëjnë një ofertë për francezin, që ka marrë një vit pushim pas aventurës tepër të suksesshme në krye të Realit të Madridit.
Me madrilenët, ish-futbollisti legjendar fitoi 3 Liga të Kampioneve radhazi dhe një titull të kampionatit spanjoll. Ideja e Roman Abramoviçit është të marrë Zidanin, për të bindur mesfushorin belg, Eden Hazard, që të rinovojë kontratën dhe të injorojë interesimin e vazhdueshëm dhe serioz të Realit të Madridit. Hazard ka deklaruar se e ka patur idhull francezin Zidane që kur ishte fëmijë.
Dhe thjesht mendimi se mund të bashkëpunojë me të mund ta bindë që të qëndrojë, duke rinovuar kontratën. Megjithatë, Sarri, ka ende kohë për të ndryshuar rrjedhën e ngjarjeve. Testi i parë do të jetë me Malmoen, në Suedi, në Ligën e Evropës, më pas e pret sfida me Mançester Junajtid në Kupn e Anglisë (FA Cup), përballja me Mançester Sitin në Kupën e Ligës dhe në fund ajo me Totenhemin në Premier Ligë, para takimit të kthimit me Malmoen.
