24 kontrolle anti-doping janë ushtruar dje në sportin shqiptar, ndërsa gjithçka është bërë nga laboratori i anti-dopingut në Tiranë pranë Agjencisë së Shërbimit të Sporteve nën drejtimin e doktor Mel Ostrenit. Sipas Ostrenit gjithçka është kryer sipas listave që Federatat Sportive kanë dërguar në Ministrinë e Arsimit dhe Sporteve dhe Komisionit Kombëtar të luftës kundër anti-dopingut. Kurse përzgjedhja e emrave është bërë nga ndërkombëtarët.
Në listë kanë qenë dy peshëngritës, dy atletë, tre mundësa, tre boksierë, dy xhudistë, të gjithë pjesëtar të ekipeve kombëtare, apo dhe kandidat për të qenë pjesë e përfaqësueseve mbi bazën e rezultateve që ato kanë arritur. Në fakt kjo është një pjesë e dytë e analizave falas akorduar nga EERADO, ndërsa në listë kanë qenë emra të tillë si Shqiponja Brahja, Emanuel Lushi, Luiza Gega, Izmir Smajlaj, Vilson Ndregjoni, Elton Azuni, etj.
Ajo që duhet pranuar është fakti se shumica e sportistëve shqiptar, të cilët janë pjesëmarrës në aktivitetet ndërkombëtare, janë të kontrolluar rregullisht siç dhe ka ndodhur në Botërorin e Peshëngritjes për të rritur në Almati. Pa thënë që jo rrallë, WADA (Agjencia Botërore e Kontrollit Antidoping) ka ushtruar kontrolle të befasishme në vendin tonë, sidomos në disiplinën e peshëngritjes. Tashmë pas këtyre kontrolleve pritet të vijnë dhe rezultatet e tyre, mbase në një periudhë të shpejtë prej 21 ditësh.
