ASNN – 27-vjeçari triumfoi në fundjavë në Kampionatin Dimëror Individual të Sallave të Mbyllura. Afro 3 javë pasi ka thyer rekordin kombëtar të garës së 800 m, atleti shqiptar, Eraldo Qerama, ka arritur një tjetër sukses personal, pasi ka spikatur në garat e Kampionatit Dimëror Individual të Atletikës në Greqi, të zhvilluara ditët e fundit. Atleti shqiptar që jeton dhe stërvitet në Greqi, ka garuar për klubin e Iliupolisit dhe është shpallur kampion kombëtar i Greqisë në Salla të Mbyllura në garën e 800 m.
27-vjeçari ka triumfuar në betejën me 24 sportistë të tjerë të kësaj disipline të atletikës, teksa 5 bateritë eliminatore u zhvilluan të dielën paradreke, ndërsa dy finalet, në mbrëmje. Fitues u shpall atleti më i shpejtë dhe shkallën më të lartë të podiumit e mori atleti shqiptar, me kohën 1 minutë, 50 sekonda e 23 të qindtat. Më 26 janar, Eraldo Qerama ka thyer rekordin e tij në këtë disiplinë, që e pati vendosur para 5 vitesh, më 17 shkurt 2013, duke i përshkuar 800 metrat për 1 minutë, 51 sekonda e 90 të qindtat.
Ndërsa në takimin e sallave të mbyllura, të mbajtur në fund të janarit në kryeqytetin e Austrisë, Vjenë, 27-vjeçari ka bërë një garë të jashtëzakonshme, duke e thyer rekordin e tij me afro 3 sekonda. Atleti kuqezi ka regjistruar kohën e re prej 1 minutë, 48 sekonda e 96 të qindtat, çka përfaqëson një përmirësim prej saktësisht prej 2 sekonda e 54 të qindtash. Më e rëndësishme është se Eraldo Qerama, i cili zuri vendin e 5-të ndër 59 atletë që garuan në kryeqytetin austriak, ka siguruar edhe kualifikimin për në Evropianin e Atletikës në Salla të Mbyllura në Gllasgou.
Normë që qëndronte në kufijtë e 1 minute, 49 sekondash e 20 të qindtash. Deri më tani, vetëm Luiza Gega dhe Eraldo Qerama janë kualifikuar me normë për këtë Evropian, por shpallja “kampion kombëtar” në Greqi është një ogur i mirë për atletin e 800 m drejt Gllasgout.
