ASNN – “Dardanët” fitojnë një vend, kuqezinjtë zbresin një vend për shkak të Kupës së Azisë. Njëra përfaqësuese shqiptare bie, tjetra ngrihet. Dhe kjo jo për meritë të tyre, aq sa për shkak të turneut kontinental të Azisë, që u mbyll para pak ditësh në Emiratet e Bashkuara Arabe. Organizmi që qeveris futbollin botëror, FIFA, ka publikuar të enjten renditjen e re të ekipeve përfaqësuese.
Ndonëse në këtë periudhë nuk ka zhvilluar asnjë ndeshje, Kosova është ngjitur për një vend në renditjen e FIFA-s. Tanimë përfaqësuesja e mbiquajtur “Dardanët”, renditet në vendin e 130-të të kësaj renditjeje përfaqësuesesh, kjo falë edhe rënies së Turkmenistanit pas Kupës së Azisë. Ndërkohë Shqipëria, ka humbur një vend në renditje, duke zbritur në të 61-tin.
Kjo rënie e kuqezinjve vjen pas suksesit historik të Katarit në Kupën e Azisë, pasi përfaqësuesja e vendit të Gjirit Persik ka bërë kapërcimin më të madh, duke ngjitur plot 38 vende në renditjen e FIFA-s. Vendi i parë ende i takon Belgjikës, që ndiqet nga kampionia e botës, Franca. Më pas vijnë, Brazili, Kroacia, Anglia, Portugalia, Uruguaji, Zvicra, Spanja dhe Danimarka, që mbyll 10-shen e parë.
