ASNN – Veprimtaria e dytë e futbollit në vend, Kupa e Shqipërisë ka njohur të mërkurën 8 skuadrat që do të vazhdojnë më tutje aventurën e tyre, pasi janë luajtur ndeshjet e kthimit të turit të 16-shes. Çiftet çerekfinaliste të Kupës së Shqipërisë, janë Partizani-Luftëtari, Kamza-Skënderbeu, Kukësi-Teuta dhe Tirana-Laçi.

Kupa e Shqipërisë ka luajtur ndeshjet e kthimit të turit të 16-shes, duke përcaktuar edhe 8 skuadrat që vazhdojnë më tej betejën për trofeun e dytë të futbollit në vend. Dhe këto skuadra janë të 8-ta të Kategorisë Superiore, pasi 6 skuadrat e Kategorisë së Parë që kishin mbetur në valle, u eliminuan.

Kështu, në takimin më të spikatur të këtij turi, atë që u luajt në Vlorë midis Flamurtarit dhe Tiranës, vendasit kanë fituar me një gol të vetëm. Por kjo nuk ka mjaftuar për t’u siguruar vlonjatëve kalimin në çerekfinale, pasi kryeqytetasit e kishin fituar ndeshjen e parë në shtëpi me rezultatin 2-0.

Ndërkaq, një gol në shtëpi i ka mjaftuar Kamzës të fitojë ndaj Vllaznisë dhe të kualifikohet, falë golit të shënuar në humbjen 1-2 të pësuar para dy javësh në takimin e parë të luajtur në Shkodër. Përmbysje të humbjes së parë ka bërë edhe Kukësi në kryeqytet ndaj Apolonisë.

Verilindorët kanë triumfuar 2-0 në ndeshjen e kthimit dhe duke e bërë të pavlefshme fitoren 2-1 të fierakëve në shtëpi para dy javësh. Rezultatin e ndeshjes së parë e përmbysi edhe Laçi, që fitoi 3-0 në fushën e vet dhe zhbëri kështu atë humbje të pësuar para dy javësh në Ballsh ndaj Bylisit vendas.

Në takimet e tjera, Partizani, Skënderbeu dhe Teuta i kanë fituar edhe ndeshjet e kthimit, përkatësisht ndaj Kastriotit, Besëlidhjes dhe Lushnjës, ndërsa Luftëtari u mjaftua me një barazim të bardhë në shtëpi ndaj Egnatias për të mbrojtur atë fitore 3-0 të arritur para dy javësh në Rrogozhinë.

Kështu, çiftet çerekfinaliste të Kupës së Shqipërisë, të cilat luhen më 13 dhe 27 mars 2019, janë, në grupin A, Partizani-Luftëtari dhe Kamza-Skënderbeu, dhe, në Grupin B, Kukësi-Teuta dhe Tirana-Laçi .

Kupa e Shqipërisë

Ndeshjet e kthimit të turit të 16-shes 

(Në kllapa rezultati i ndeshjeve të para)

Grupi A

Partizani – Kastrioti              3-0      (4-2)

Hebaj 34′, Mensah 60′, Çinari 64′

Skënderbeu – Besëlidhja    3-0      (2-1)

Vangjeli 57′, Abazi, 72’m Krasniqi 84′)

Luftëtari – Egnatia                0-0      (3-0)

Kamza – Vllaznia                  1-0      (1-2)

Bitri 63′

Grupi B

Kukësi – Apolonia                2-0      (1-2)

(Shkurtaj 27′, Et’hemi 97)

Laçi – Bylis                             3-0      (0-2)

Shtubina 9′(11-m), Toro 28′ , Gjoni 44′

Teuta – Lushnja                    4-0      (3-1)

Vecaj 30′, 31′, Vila 47′, Latif

Flamurtari – Tirana               1-0      (0-2)

(Kale 49′)

Çerekfinalet

(23 & 27 mars 2019)

Kamza – Skënderbeu

Partizani – Luftëtari

Teuta – Kukësi

Tirana – Laçi