ASNN – Mesfushori i Kombëtares kuqezi, Taulant Xhaka ka dhënë një intervistë për gazetën e njohur zvicerane, “Blick”, ku ka rrokur një sërë çështjesh dhe ka kujtuar dhe një herë se nuk është penduar që ka zgjedhur të luajë për Shqipërinë para Zvicrës dhe Kosovës. Për Xhakën Shqipëria vjen e para. “Nuk jam penduar që zgjodha Shqipërinë, – u shpreh ndër të tjera Taulant Xhaka, – por më vjen mirë për ecurinë që ka pasur këto kohë Kosova. Ata po kalojnë një periudhë të mirë, atje kanë shumë eufori dhe ekipi ka shumë talent.”
Më pas mesfushori kuqezi komentoi ecurinë e Zvicrës, për të cilën tha se kishte bërë tifozllëk të zjarrtë gjatë kohës kur përfaqësuesja helvete luante në Botërorin e Rusisë, kjo dhe për faktin se në ekip luante vëllai i tij Granit Xhaka. “Lutesha vazhdimisht dhe prisja paraqitjet e mira ndaj Brazilit dhe Serbisë. Pastaj ekipi dukej pak i lodhur ndaj Suedisë”, pohoi Xhaka i madh. Ka dhe një moment kur provokohet me pyetjen për shqiponjën me duar, është fjala për festimin e veçantë të lojtarëve shqiptarë kur shënojnë gol.
“Aq shumë është folur për të sa që nuk dua që të rihap si diskutim, nuk ia vlen ta hapim prapë këtë temë”, shtoi më tej mesfushori i përfaqësueses së Shqipërisë, i cili e ka origjinën nga Kosova. Në fund, Xhaka përmend për gazetën “Blick” një objektiv personal që ka me Bazelin Së superligën zvicerane. Bëhet fjalë për një rekord që lidhet me numrin e ndeshjeve me skuadrën e Bazelit, një rekord që mbahet nga i famshmi Çekaroni, i cili ka luajtur 452 ndeshje me këtë skuadër.
“Dëshira ime është që ta mbyll karrierën te Bazeli, – theksoi në fund Xhaka, – dhe nuk kam pse të dal detyrimisht të luaj jashtë Zvicrës. Bazeli është klubi i zemrës time, këtu jam në shtëpi, këtu ndjehem mirë. Unë edhe mendoj të mbetem pjesë e klubit pasi të mbyll karrierën time. 30 ndeshje në 7 vitet e ardhshme për rekordin e Çekaronit? Sinqerisht e them që nuk është e pamundur, jam vetëm 27 vjeç dhe mund ta përballoj. Të bëhesha rekordmeni i Bazelit do të ishte një ëndërr që bëhet realitet për mua. Shpresoj që gjithçka të shkojë mirë”.
Duket qartë se Xhaka dëshiron të ketë një vend në radhët e klubit kur të tërhiqet nga futbolli profesionist. Emri i tij, koha e gjatë në skuadër dhe fakti që nuk e ka tradhtuar Bazelin asnjëherë, duke qenë ndër më popullorët e skuadrës dhe tifozëve, tregojnë se Xhaka do ta ketë një shans edhe si funksionar në klubin e njohur zviceran.
