ASNN – Ekipi i basketbollit të Prishtinës pësoi mërkurën një humbje të rëndë në kuadër të grupit I në Kupën e Evropës (FIBA Europe Cup), ku u mund në Hungari nga Zolnoki Olaj me rezultatin 89-76. Ishte një ndeshje tërësisht e ekuilibruar, sidomos në 3 pjesët e para të saj, ku rezultati ishte vazhdimisht i barabartë. Por hungarezët, të mbështetur nga publiku i tyre dhe duke shfrytëzuar disa gabime në mbulim të lojtarëve shqiptarë nga Kosova, ia dolën të bënin diferencën në minutat e fundit dhe ta fitonin ndeshjen.
10-minutëshi i parë i ndeshjes u fitua nga Prishtina me sifrat 23-20, një shenjë e mirë për skuadrën shqiptare të Kosovës që të shpresonte e besonte tek fitorja. Madje Prishtina e ruajti epërsinë edhe pas 10-minutëshit të dytë, i cili përfundoi 20-19 për hungarezët, por në pushimin midis dy pjesëve Prishtina udhëhiqte 42-40, duke qenë në rrugën e duhur.
Në 10-minutëshin e tretë hungarezët fitojnë me shifrat 19-17 dhe rezultati barazohet 59-59, duke qenë në ekuilibër të plotë. Edhe në periodën e katërt dhe të fundit ndeshja luhet e barabartë dhe skuadrat shkojnë “majë më majë” deri 2 minuta para fundit, kur hungarezët realizojnë disa goditje të sakta për dy e tri pikë, duke bërë diferencën në parket. Edhe pse Prishtina u përpoq të përmbyste gjithçka në minutën e fundit, nuk ia doli, për pasojë fituan hungarezët 30-17 dhe krejt ndeshjen 89-76, duke ia marrë vendin e tretë në renditjen e grupit I.
Kur mbetet dhe një ndeshje për t’u luajtur në grup, ajo ndaj Pënar Karshijakës turke, Prishtina zbriti në vend të fundit, me 6 pikë, po aq sa Zolnoki Olaj por hungarezët kanë pikëaverazh më të mirë. Në ndeshjen e fundit Prishtina duhet të fitojë ndaj turqve të Karshijakës dhe hungarezët të humbasin ndaj gjermanëve të Vyrsburgut që të rimarrin vendin e tretë në grup, i cili, gjithsesi, nuk i çon asgjëkundi dhe kosovarët do ta mbyllin këtu aventurën e tyre në Kupën e Evropës.
Zolnoki Olaj-KB Prishtina 89-76
(20-23, 20-19, 19-17, 30-17)
Renditja
Nr. Skuadra N F H Pikë
- Oliver Vyrzburg 5 5 0 10
- Pënar Karshijaka 5 3 2 8
- Zolnoki Olaj 5 1 4 6
- KB Prishtina 5 1 4 6
