ASNN – Vërtetohet, Laçi është “macja e zezë” e Superiores, “mur” i pakalueshëm për Kukësin. Ky i fundit bëri një merkato mjaft aktive dhe me emra të spikatur në këtë periudhë tranzitore dimërore, me pretendime titulli. Ishin pikërisht këto blerje dhe këto lëvizje në kampin verilindor që i kishin dhënë skuadrës së trajnerit Armand Cungu sharmin e një grupi pretendent kryesor për trofeun e kampionatit.

Por të shtunën, në fushë, edhe pse dominoi, Kukësi, nuk fitoi dhe meritë për këtë ka Laçi, si dhe portieri i skuadrës kurbinase, Gentian Selmani, të cilët ishin një “mur” i pakalueshëm dhe ia dolën të barazonin 0-0 në këtë ndeshje, duke dalë me një pikë me vlerë nga përballja me njërën prej skuadrave më të forta të këtij edicioni. Ndeshja e luajtur në Kamzë nuk pati histori sepse i munguan golat.

Por në çdo drejtim tjetër ishte e bukur, e rivalizuar, e luftuar deri në fund dhe natyrisht emocionuese. Kukësi në fillim kishte pasiguri, që vinte nga skema taktike që ndoqi në lojë dhe nga mungesa e guximit në fazën ofensive. Me kalimin e minutave u pa qartë se Kukësi duhej të bënte ndryshime, për të përforcuar sulmin. Dhe sulmi i skuadrës verilindore bëhet agresiv.

Krijohen shumë raste dhe tentohet të fitohet ndeshja me çdo kusht. Por Selmani bën ndeshjen e sezonit. Ai ka siguri në daljet e tij dhe është mur i pakalueshëm. Falë pritjeve të tij Laçi ia doli ta ruajë portën e paprekur dhe të marrë një pikë nga kjo përballje. Vetë trajneri Armand Cungu i Kukësit e lavdëroi trajnerin e ekipit kurbinas, duke thënë se ia mohoi dy pikë të tjera Kukësit në këtë ndeshje.

Natyrisht, rezultati favorizon Laçin, që mbetet gjithashtu pretendent për zonën evropiane, kurse Kukësi largohet disi nga Partizani, pasi të kuqtë kanë 40 pikë, ndërsa ekipi verilindor 35 pikë dhe tani rrezikon edhe vendin e dytë nëse Teuta e fiton të dielën ndeshjen e saj me Flamurtarin.

Kategoria Superiore

Java e 19-te

Të premten, 25 janar 2019:

Skënderbeu – Partizani       0-1

Të shtunën, 26 janar 2019:

Kukësi – Laçi                         0-0

Të dielën, 27 janar 2019:

Luftëtari – Kastrioti                (14:00)

Tirana – Kamza                     (17:00)

Teuta – Flamurtari                (17:00)

Renditja

Nr.       Skuadra         Pikë

1. Partizani        40
2. Kukësi            35
3. Teuta              33
4. Laçi                 31
5. Skënderbeu  30
6.        Flamurtari      28
7. Tirana             17
8. Luftëtari         17
9. Kamza            15
10. Kastrioti 10