ASNN – Kupa e Shqipërisë asnjë surprizë, në gjysmëfinale të njëjtat skuadra që pretendojnë titullin. Të mërkurën u luajtën ndeshjet çerekfinale të Kupës së Shqipërisë në basketboll për femra, ku nuk pati kurrfarë surprize, sepse kaluan në gjysmëfinale ekipet që janë njëherësh pretendente dhe në kampionat. Madje Vllaznia e mori fitoren në tavolinë, pasi rivalja e saj, Studenti, nuk u paraqit në ndeshje, për pasojë vajzat shkodrane do të marrin fitore në tavolinë 20-0, siç edhe e përcakton rregullorja për këto raste.

Flamurtari fitoi ndaj Elbasanit me rezultatin 92-80, duke mos i lënë asnjë shans vajzave të Elbasanit që të shpresonin kalimin në turin tjetër. Tre pjesët e para folën për ekipin vlonjat dhe vetëm 10-minutëshi i fundit ishte më i mirë për vajzat mike. Flamurtari i trajnerit Viron Toska ka ambicie në të dy frontet, prandaj po e vlerëson maksimalisht edhe Kupën e Shqipërisë. Ndërkohë, fitore bindëse korri edhe SHKBF Tirana, e trajnerit Erdal Borova, që mundi Skënderbeun 74-54. 20 pikët diferencë në këtë ndeshje tregojnë qartë superioritetin e vajzave bardheblu.

Të cilat as e vunë në diskutim kalimin në gjysmëfinale, në mënyrë plotësisht të merituar. Me përjashtim të 10-minutëshit të dytë që u fitua nga vajzat korçare 24-22, të 3 pjesët e tjera të lojës folën për vajzat bardheblu, që e dominuan “dhunshëm” ndeshjen dhe merituan gjysmëfinalen. Kujtojmë që SHKBF Tirana është një nga pretendentet kryesore për ta fituar këtë veprimtari. Fitoren më të thellë në basketbollin e femrave, në këtë fazë të Kupës së Shqipërisë, e korri SHBF Tirana, e trajneres Mirza Alibegaj, e cila mundi Apoloninë me shifrat 110-63.

Janë 47 pikë diferencë që nuk kanë nevojë për koment. Njësoj si SHKBF Tirana dhe Flamurtari, edhe SHBF Tirana është një pretendente për trofeun e Kupës, kështu që gjysmëfinalet do të jenë mjaft interesante. Paraqitja e skuadrave në këtë veprimtari do të thotë shumë dhe për vazhdimësinë në kampionat, pasi ekipet kanë prej disa javësh që bëjnë fazë përgatitore dhe janë me pretendime të mëdha.

Kupa e Shqipërisë

Basketboll – Femra

Çerekfinalet:

Flamurtari – Elbasani                         92-80

(28-22, 20-13, 20-14, 24-31)

SHBF Tirana – Apolonia                 110-63

(34-9, 31-17, 24-14, 21-23)

SHKBF Tirana – Skënderbeu          74-54

(18-12, 22-24, 13-8, 21-10)

Vllaznia – Studenti                              20-0

(fitore në tavolinë)

Shënim: Shorti për gjysmëfinalet hidhet më 28 janar në zyrat e FSHB-së.