ASNN – Tirana mund Flamurtarin dhe sheh nga çerekfinalja, vlonjatët në krizë. Flamurtari është në krizë dhe kjo u vërtetua edhe të enjte, ku vlonjatët u mposhtën në Stadiumin “Selman Stërmasi” në kryeqytet nga Tirana. Fituan bardheblutë 2-0 dhe me këtë fitore ekipi i trajnerit Ardian Mema sheh drejt çerekfinaleve, megjithëse do të duhen edhe 90 minuta të tjera përballje mes dy skuadrave për të përcaktuar skuadrën që shkon më tej.
Siç dihet, ndeshja ishte ndërprerë mbrëmjen e të mërkurës pas reshjeve të dendura të shiut që e bënë fushën të papërshtatshme dhe të pamundur për të vazhduar lojën. Ndeshja u ndërpre në minutën e 25-të dhe pikërisht në këtë minutë rinisi sot. Por ndryshe nga mbrëmja e së mërkurës, të enjten në drekë ekipi i Memës kishte marrë masat e duhura për të përmirësuar aspektet e lojës dhe për të qenë konkret në finalizim, duke ia dalë me sukses dhe në momentin e duhur.
Ishin dy gola të shpejtë për bardheblutë në minutën e 37-të dhe të 40-të, që vulosën fitoren 2-0. Në rastin e golit të parë ishte Majkëll Ngo që bëri si duhet veprimet me topin dhe në pozicion të përshtatshëm gjuajti saktë dhe nuk i dha asnjë shans Koliqit për të reaguar. Tre minuta më vonë, ekipi bardheblu vulosi fatin e ndeshjes, me një gjuajtje nga larg të Hoxhallarit, që u preh në rrjetë.
Në pjesën e dytë nuk pari ndryshim rezultati dhe Flamurtari u tregua i dobët në këtë përballje. Trajneri Mema nuk e fshehu gëzimin e fitores dhe u tregua mjaft i sinqertë në fund kur tha se Kupa ishte shansi i vetëm për Tiranën për të shkuar në Ligën e Europës, kurse rivali i tij Daja nuk e evitoi nervozizmin, teksa nuk i munguan edhe thumbimet për lojtarët e tij. Sidoqoftë, ai theksoi në fund se llogaritë nuk janë mbyllur ende.
Dhe se Flamurtari do të përpiqej ta përmbyste Tiranën në ndeshjen e kthimit, megjithëse bardheblutë mund të quhen favoritë tashmë për të kaluar në çerekfinale.
