ASNN – Teuta “mbretëreshë” në Ligën Ballkanike, mposht Kozhuvin dhe ruan kreun e renditjes. Teuta po tregohet skuadër me “petk” kampioneje edhe në Ligën Ballkanike. Për herë të parë një skuadër e kampionatit shqiptar arrin të fitojë 7 ndeshje ndërkombëtare në 10 takime të luajtura gjithsej. Këtë paraqitje të mirë skuadra durrsake e vijoi dhe të mërkurën në mbrëmje në Pallatin e Sportit “Ramazan Njala” të qytetit të Durrësit, ku mposhti me shifrat 79-70 ekipin maqedonas të Kozhuvit.

Ishte një ndeshje e dominuar nga “Djemtë e detit”, të cilët lanë të kuptohej që në 10-minutëshin e parë se nuk kishin ndërmend ta linin ndeshjen në mëshirë të fatit. Këtë pjesë e fituan me shifrat 24-19, një 5-pikësh diferencë që do të thoshte shumë për vazhdimësinë e lojës. Edhe 10-minutëshi i dytë foli për durrsakët, por nëpërmjet një loje më të ekuilibruar, pasi miqtë u mbrojtën fort. Fitoi Teuta 17-15 dhe e mbylli gjysmën e parë të ndeshjes me shifrat 41-34.

Shtatë pikë diferencë në dy pjesët e para ishin domethënëse për vazhdimësinë e takimit, sepse Teuta mund ta kontrollonte fitoren. Në 10-minutëshin e 3-të ishin miqtë e Kozhuvit që luajtën më të organizuar dhe kjo edhe për shkak të një mendjelehtësie të Teutës që lëshoi shumë në parket. Fituan miqtë 22-20, por pa mundur ta përmbysnin ndeshjen, e cila vijonte të dominohej nga durrsakët. Mbetet të luhej edhe 10-minutëshi i fundit, por në këtë pjesë të fundit të lojës Teuta u tregua e kujdesshme.

Dhe e fitoi me shifrat 18-14, dhe krejt ndeshjen 79-70, duke marrë një dypikësh me mjaft vlerë për renditjen përfundimtare. Kjo fitore siguron pjesëmarrjen e Teutës në “play-off”-in final, ku do të diskutohet edhe titulli “kampion” në Ligën Ballkanike. Durrsakët mbeten në vend të parë me 17 pikë tashmë, ndjekur nga bullgarët e Akademik Bulteksit me 15 pikë, por që bullgarët kanë një ndeshje më pak të zhvilluar. Pra durrsakët e koshit korrën një sukses të rëndësishëm në këtë aktivitet rajonal.

Teuta – Kozhuv                     79-70

(24-19, 17-15, 20-22, 18-14)

Renditja:

Nr.       Skuadra                                 N.        F.         H.        Pikë

1. KS Teuta                               10        7          3          17
2. Akademik Bulteks                  9        6          3          15
3. BC Beroe Stara-Zagora        6        6          0          12
4. KK Blokotehna-NB                6        4          2          10
5. KB Bashkimi                           8        1          7            9
6. KK Kozhuv                              7        1          6            8
7. BC Barsi Atirau                      6        1          5            7