ASNN – Cicipas, “përralla” e sivjetme e “Australia Open”, eliminon Bautista-Agut e pret në gjysmëfinale Nadalin. Turneu i Hapur i Australisë në tenis, “Australia Open”, po dhuron surpriza të mëdha tek meshkujt, pasi talenti grek 20-vjeçar, Stefan Cicipas kaloi në gjysmëfinale të turneut. Pasi eliminoi me shumë bujë tenistin legjendar zviceran Rozher Federer, greku Cicipas eliminoi në çerekfinale argjentinasin Roberto Bautista-Agut me rezultatin 3-1.
Tashmë nuk është befasi, as fat, pasi Cicipas po tregon superioritet në fushë, dëshmuar me lojë mjaft cilësore dhe zhdërvjelltësi në veprime, duke qenë tashmë kandidat për të fituar trofeun e parë “Grend Slem” të këtij viti. 7-5 fitoi setin e parë greku, ndërsa argjentinasi fitoi setin e dytë 6-4. Më pas vijnë dy fitore radhazi të Cicipasit, me shifrat 6-4 dhe 7-6, duke bërë që tenisti helen të kalojë për herë të parë në karrierën e tij në gjysmëfinale të këtij turneu.
Sipas informacioneve që servirin mediat australiane, greku Cicipas bëhet tenisti më i ri që nga vit 2003 që arrin në gjysmëfinalen e “Australia Open” pas Endi Rodik. Tenisti grek tashmë e ka kaluar momentin e surprizave dhe në gjysmëfinale do të ketë përballë tenistin numër dy në botë, spanjollin Rafael Nadal. Spanjolli mposhti në çerekfinale tenistin amerikan Tiafoe, me rezultatin e thellë 3-0, duke mos e vënë në asnjë moment në diskutim fitoren.
Kështu, Nadal fitoi setin e parë 6-3, më pas të dytin 6-4 dhe në fund setin e tretë 6-2, duke kaluar me lehtësi në gjysmëfinalen e “Australia Open”. Padyshim, Rafael Nadal dhe serbi Novak Xhokoviç konsiderohen favoritë për të fituar këtë turne.
