ASNN – Trajneri Nevil Dede ka zbardhur listën me 23 futbollistë që do të grumbullohen në resortin “Tropikal” në Durrës. Për pesë ditë me radhë Dede do të testojë elementët e kësja moshe, që janë kryesisht nga kampionati shqiptar. Dominojnë futbollistët e rinj që janë pjesë e klubeve të Partizanit, Tiranës, Laçit e ndonjë tjetri, ndërkohë që ka habitur tërësisht me 6 ftesa për lojtarët e rinj të kësaj moshe që janë pjesë e skuadrës shqiptare në Maqedoni, kampiones së vendit fqinj, Shkëndijës së Tetovës.
3 mbrojtës dhe 3 mesfushorë vijnë pikërisht nga ekipi tetovar, afrime që mund t’i japin shans Dedes të zgjedhë elementët më të mirë për duelet e ardhshme zyrtare të ekipit. Kuptohet, në radhët e dy skuadrave të kryeqytettit ka plot të rinj të talentuar që e kanë kërkuar një shans dhe ndoshta Dede do t’ua japë këtë mundësi që të shpalosin vlerat e tyre. Sigurisht, baza e grupit në duelet zyrtare vjen nga jashtë, sidomos nga klubet italiane të të rinjve (Primavera), ose të Serisë B, apo dhe vendeve të tjera.
Për t’u shënuar është dhe ftesa për Emiliano Bullarin, futbollistin i cili është pjesë e Olimpiakosit në kampionatin grek. Ai është sulmues dhe mund të shërbejë si potencial i mirë në vijën e parë për skuadrën e trajnerit Dede në duelet e ardhshme eliminatore. Bullarin e ka kërkuar edhe federate greke, me qëllim pajisjen e tij me pasaportë dhe përfshirjen në ekipet zinxhirë të përfaqësueses greke. Kjo ftesë e Dedes dëshmon se FSHF dhe sektori i ekipeve kombëtare në veçanti e ka Bullarin preferencë të rëndësishme.
