ASNN – Kukësi është klubi që po lëviz më shumë në këtë merkato dimri. E paralajmëroi Presidenti i skuadrës, Safet Gjici, prej disa ditësh, duke pretenduar afrime të nivelit të lartë. Pretendimet më të mëdha ishin për sulmuesin Vasil Shkurtaj, por të paktën zyrtarisht është konfirmuar ardhja e Eduard Rrocës. Ishte një blerje që i jep lehtësira Kukësit në këtë rrugëtim sezonal, por nuk e evidenton atë pretendent kryesor për titullin “kampion”. E ndërsa merkato e janarit ka hyrë tashmë zyrtarisht, Kukësi duket i pasigurt se ku do të dalë me lëvizjet e tij.
Sepse, pas afrimit të Rrocës, ekipin verilindor e kanë prekur largimet. Dhe bëhet fjalë për një largim me peshë, sikurse është ai i Donjet Shkodrës. Fantazisti nga Kosova e ka konfirmuar edhe zyrtarisht largimin, por pa dhënë detaje se ku do të jetë destinacioni i ri. E ndërsa presidenti i skuadrës Safet Gjici i ushtron presion trajnerit Armando Cungu, duke i thënë se tani i janë plotësuar të gjitha kërkesat dhe duhet të fitojë titullin, në të vërtetë, grupit i është larguar numri 10, një lojtar me cilësi teknike të admirueshme dhe një fantazist që i duhej ekipit verilindor.
Ndërkohë, Kukësi ende shpreson që Vasil Shkurtaj do të bëhet pjesë e tyre, megjithëse asgjë nuk është e sigurt. Merkato vijon dhe në kushtet e kampionatit tonë është vërtetuar se deri më 31 janar, një lojtar cilësor në treg reklamohet si blerje deri në sekondën e fundit, deri atëherë kur futbollisti të marrë vendimin final. Sidoqoftë, kjo fazë e transferimeve nuk ofron shumë alternativa cilësore sepse shumica e futbollistëve vendas janë nën kontratë, kështu që përforcimet ndodh rrallë që të bëjnë diferencë apo që të ndryshojnë rrjedhën e garës.
